३२ वर्षीय बसेलको हत्यामा संलग्न थप एकजना बुटवलबाट पक्राउ

बुटवल । केहिदिन अघि बाग्लुङ्गको बुर्तिबाङ्गस्थित रिनाम गाउँमा गाडिएको अवस्थामा फेला परेको शव काण्डका अर्का हत्या अभियोगी पनि बुटवल प्रहरीले शुक्रबार दिउँसो पक्राउ गरी सोही राति नै जिल्ला प्रहरी कार्यालय बाग्लुङ्ग पठाएको छ । चैत्र ४ गते साँझ देखि बुटवलबाट बेपत्ता भएका पुर्वी नवलपरासीको देवचुली नगरपालिका वडा नम्वर ३ केवरेनीका ३२ वर्षिय युवक नारायण बस्यालको शव बुधवार नयाँ वर्षको दिन वुर्तिबाङ्ग इलाका प्रहरी कार्यालयको टोलीले गाडेको अवस्थामा फेला पारेको थियो ।

बेपत्ता भएको झण्डै २५ दिन सम्म बेपत्ता बस्यालको बारेमा बाग्लुङ्ग र रुपन्देहीको प्रहरीले देशैभर ब्यापक रुपमा खोजी गरेको थियो । यहि क्रममा दुर्गन्ध बढ्दै जाँदा ढोरपाटन नगरपालिका वडा नम्वर २ , साविक वुर्तिबाङ्ग गाविसको रिनाम बन्ने स्थानमा गाडिएको अवस्थामा बस्यालको शव फेला पारिएको र उनको कपडामा रहेको कागजातबाट उनको पहिचान गरिएको ईलाका प्रहरी कार्यालय वुर्तिबाङ्गका प्रमुख प्रहरी निरीक्षक जयराम वन्तले बताए ।

त्यसै लेनदेनको कागजातबाटै जिल्ला प्रहरी कार्यालय बाग्लुङ्गले हत्या गर्ने ब्यक्ति बुर्तिबाङ्ग रिनाम कै अन्दाजी अन्दाजी ३४ बर्वाीय मित्रलाल खनालले हत्या गरेको पत्ता लगाएपछि ईलाका प्रहरी कार्यालय बुटवलले बिहिवार बुटवलबाटै निजलाई पक्राउ गरेको थियो । पक्राउ पछि आफूले हत्या नगरेको अर्कै मान्छेले हत्या गरेको तर, शव लुकाउन आफूले उसैदिन राति सुटकेश भित्र राखेर बसको डिक्कीमा वुर्तिबाङ्ग पुराई गाडेको बयान दिएका थिए । इलाका प्रहरी कार्यालय बुटवलका प्रमुख डिएसपी प्रतितसिंह राठौर भन्छन–‘ हत्यामा खनालका अन्य आफन्त पनि संलग्न हुन सक्ने लागेर अनुसन्धान गरिँदै जाँदा निजको दाजु अन्दाजी ४२ वर्षीय गौरीशंकर खनाल बस्यालको हत्यामा मुख्य ब्यक्ति भएको पाइयो र खोज तलास सुरु गरेका थियौं ।

हिजो बुटवल माथीको नुवाकोट भन्ने जंगलमा फेला पारेर हिजै बाग्लुङ्ग पठाइएको छ । दाजु गौरीशंकर भारतमा बस्ने आवत–जावत गर्ने गरेको बताइएको छ । डिएसपी राठौरका अनुसार यी दुई बीच डेढ वर्ष अघिदेखि चिनजान भएको थियो । परिवारजनका अनुसार खनालले बुटवल ट्राफिकचोकमा सियो जब डटकम भन्ने अनलाईन सेवा सञ्चालन गर्दै आई रहेका थिए । डिएसपी राठौर थप्छन–‘बुटवल मै रहेका हत्या अभियोगी खनाललले बस्यालँंग सामुहिक ब्यवसाय गर्न भनि करिव १३ लाख रुपैयाँ लिएको पाइएको छ र त्यही रकम लिन भनि बुटवल कोठामा बोलाएको र कोठा मै हत्या गरि बुर्तिबाङ्ग शव पुराएको निजले स्वीकार गरेको छ । ’

मृतक बस्यालका सहोदर दाजु भागिरथ बस्याल भन्छन्–‘हत्यामा संलग्नले भाई संग पटक पटक गरि ११ लाख रुपैयाँ लगेको प्रमाण नै फेला परेको छ । त्यही रकम लिन भनि अघिल्लो दिन फोनमा बोलाएको र अर्को दिन पैसा लिन जाउँ भनि आफैले कोठामा लगेर गएको र कोठा मै हत्या गरि शव बुर्तिबाङ्गतिर लगेको प्रहरीले बताएको छ । ’ उनका अनुसार मृतक बस्याल करिब २ वर्ष यता बुटवलमा बसेर ब्यवसाय सञ्चालन गर्दै आएका थिए । त्यस अघि स्टुडेन्ट भिसामा ७ वर्षसम्म जापन बसेर फर्किएका थिए । विवाहित उनले श्रीमती पनि बुटवलको आदर्शनगरमा डेरा गरि राखेका थिए । हत्यामा संलग्न दाजु गौरीशंकर भारतको पेशेवर हत्याराहरुसँग पनि संलन्न रहेको हुन सक्ने र परिवारका अन्य सदस्य पनि हत्यामा संलग्न हुन सक्ने तर्फ प्रहरीले अनुसन्धान गरिरहेको जनाईएको छ ।