रुपन्देहीको सैनामैनामा सवारी दुर्घटना, एक जनाको मृत्यु

बुटवल । रुपन्देहीको सैनामैनामा मोटरसाइकल र ट्रक एक आपसमा ठक्कर खाँदा एक जनाको मृत्यु भएको छ । सैनामैना नगरपालिका–११ सालझण्डी (बनकट्टी) मा आइतबार दिउँसो बुटवलबाट कपिलबस्तु तर्फ जाँदै गरेको लु ४२ प ७५ नम्बरको मोटरसाइकल र विपरीत दिशाबाट आइरहेको भे १ ख २६८६ नम्बरको ट्रक आपसमा ठोक्किदा सो दुर्घटना भएको हो ।

दुर्घटनामा परी मोटरसाइकलका चालक कपिलबस्तुको कपिलबस्तु नगरपालिका–९ का ३४ वर्षीय विमल गिरीको मृत्यु भएको प्रदेश प्रहरी कार्यालय, बुटवलले जनाएको छ । दुर्घटनामा परी घाइते गिरीको उपचारको क्रममा लुम्बिनी प्रादेशिक अस्पताल बुटवलमा मृत्यु भएको हो ।