प्रधानमन्त्रीले संविधानमाथि ‘कु’ गरे : युवा नेता गुरुङ

बुटवल । नेकपा प्रचण्ड-नेपाल समुहका नेता तथा युवा संघका पूर्व उपाध्यक्ष राजु गुरूङले प्रधानमन्त्री केपि शर्मा ओलिले संविधान माथी कु गरेको आरोप लगाएका छन् । प्रधानमन्त्रीले २०१७ सालमा रामा महेन्द्रले गरेको कु भन्दा पनि खतरनाक रुपमा अहिलेको संविधान कु गरिएको बताए ।

युवा संघ नेपाल र अनेरास्ववियुले आइतबार आज रिपोटर्स क्लब बुटवलमा आयोजना गरेको पत्रकार सम्मेलनमा बोल्दै नेता गुरुङले प्रधानमन्त्रीका कारण कम्यूनिष्ट पार्टी र संविधान ध्वस्त पार्ने काम भएको बताए । प्रतिनिधि सभा पुनःस्थापना नहुँदासम्म सडक संघर्ष जारी राख्ने बताउँदै उनले फेरी पनि युवाहरु जुटेर सडक तताउने चेतावनी दिए ।

संसद पुनःस्थापना नै संविधान र देश बचाउने एक मात्र विकल्प भएको बताउँदै उनले प्रधानमन्त्रिलाई काम गर्न दिइएन भनेर संसद विघटन गर्नु गलत भएको बताए । एमसिसिलाई राष्ट्र हितमा बनाउनुपर्ने सुझाव मात्रै पार्टिले दिएको तर, प्रधानमन्त्रीलाई काम गर्न दिईएन भन्ने कुरा गलत भएको बताए ।

युवा संघका केन्द्रीय सचिवालय सदस्य सरिता श्रीसले प्रधानमन्त्रीले संविधानमाथि गरेको प्रहारका विरूद्व सडमा आएको बताइन । उनले कसैलाई प्रधानमन्त्री वा राष्ट्रपति बनाउन सडकमा नआएको बताइन । ‘के का लागि हो चुनाव, यो चुनावको सुनिश्चितता के छ ?’-प्रश्न गर्दै उनले भनिन् ‘आन्तरिक विवादका कारण संविधानको घाँटी निमोठ्न पाईदैन, हाम्रो भविष्यमाथि खेल्ने अधिकार कसैलाई छैन, चुनावमा आउने नैतिकता छैन ।’