‘कोरोना केही होइन भन्नू मूर्खता हो, ज्यान जान सक्छ’

बुटवल । ओमकुमार श्रेष्ठ कोरोना जितेर भर्खर तंग्रिँदै छन् । सामान्य अवस्थाको जस्तो स्फूर्ती उनको शरीरमा अझै पलाएको छैन । ‘कोरोना जित्न सक्छु ।’ भन्ने आँट भने उनले बटुली सकेका छन् । रुपन्देहीको सिद्धार्थनगर नगरपालिकाका व्यवसायी तथा विभिन्न सामाजिक संघ संस्थामा क्रियाशिल श्रेष्ठले १८ दिनको लामो संघर्षपछि कोरोनासँग विजयी प्राप्त गर्न सफल भए ।

सुरुमा सामान्य रुघा खोकी लागेपनि मौसमी फ्लू वा अन्य कुनै कारणले भएको भन्दै करिब १ हप्तासम्म नजरअन्दाज गरेका उनको शरिरमा कतिखेर कोरोना भाइरसले बास बसाल्यो उनलाई नै पत्तो भएन । सुख्खा खोकी लागीरहने, ज्वरो कम हुनुको साटो थप बढ्दै गएपछि उनि अस्पतालमा उपचारका लागि पुगे । अस्पताल पुगेका उनलाई चिकित्सकको सल्लाह अनुसार पिसिआर टेस्ट गराउँदा कोरोना पोजेटिभ देखा पर्यो ।

आफूलाई कोरोना संक्रमण भएको पुष्टि भएपछि उनको परिवारको पनि पिसिआर परीक्षण गर्नुपर्ने भयो । श्रेष्ठका श्रीमती, ७ वर्षको छोरी, १३ वर्षकी छोरी, सँगै बस्ने दाईको छोरो, जेठानको छोरो र बुढी आमाको पिसिआर परीक्षण गराउँदा बुढी आमा र दाईको छोरो बाहेक सबैलाई कोरोना संक्रमण भइसकेको प्रमाणित भयो । एउटै घरमा बस्दा बुढी आमा र अन्य परिवारलाई पनि संक्रमण हुने डर भएपछि उनले होटल आइसोलेशनमा बस्ने निधो गरे।

भैरहवाकै एक होटलमा उनीसहित ५ जना परिवार आइसोलेशनमा बस्न पुगे । असोजको २१ गते परिवारसहित होटल आइसोलेशनमा पुगेका श्रेष्ठलाई ज्वरो तथा खोकी कम हुनुको साटो थप बढ्दै गएपछि अवस्था गम्भीर हुन थाल्यो । चिकित्सकहरुले उनी तथा उनको परिवारसँग सल्लाह गरी आइसियूमा बस्नु पर्ने सल्लाह दिए । भैरहवा मेडिकल कलेजमा २५ गते विहान १ बजेनै रातारात आइसियूमा भर्ना हुन पुगे । २५ गतेदेखि आइसियूमा बसेका श्रेष्ठ ३१ गते मात्रै अस्पतालबाट स्वास्थ्य अवस्था सुधार भएपछि पुनः होटल आइसोलेशनमा फर्किए । होटलमा बसेका परिवारहरु कोरोना जितेर सामान्य अवस्थामा पुगिसकेका थिए ।

उनिहरुको अवस्था सामान्य भएपछि १४ दिनको आइसोलेशन बसाई सकेर ४ जना परिवार घर फर्किए पनि श्रेष्ठ भने अझ ३ दिनका लागि घर फर्किन पाएनन् । आइसोलेशन बसाईको १८ दिनछि मात्रै चिकित्सकहरुको सल्लाह अनुसार कोरोना जितेर घर फर्किए । यसरी स्वास्थ्य अवस्था सामान्य भएर घर फर्किन पाउँदा उनलाई एक महान यूद्ध जितेर फर्किएको योद्धाको भन्दा उनको खुशी कम थिएन ।

ओम श्रेष्ठलाई कोरोना संक्रमण सामान्य जस्तै लाग्थ्यो । नेपालमा कोरोनाको प्रभाव त्यती भयावह अवस्थामा छ जस्तो उनलाई लागेको थिएन । जव कोरोनाले उनी आफैलाई आक्रमण गर्यो तव उनलाई लाग्न थाल्यो कोरोना समुदाय स्तरमा मात्र होइन प्रत्येकको घर–घरमा पसिसकेको छ । अव स्वास्थ्य सुरक्षा तथा सचेतना अपनाउनुको विकल्प छैन । दैनिक जीवनमा गरीने हरेक क्रियाकलापहरु स्वास्थ्य सुरक्षा अपनाउन उनले सल्लाह दिन्छन् । सकेसम्म घर बाहिर ननिस्कने, निस्कनै पर्ने अवस्था भए अनिवार्य मास्क लगाउने, स्यानिटाइजर प्रयोग गरिरहेने तथा अनिवार्य रुपमा सामाजिक दूरी कायम राख्न उनले सल्लाह दिने गरेका छन् ।

संक्रमण हुनुभन्दा पहिले आफूले दैनिक जिवनमा गर्ने गरेरका व्यवहार सम्झिँदै उनले कसैलाई पनि कोरोनाप्रति हेलचक्र्याई नर्गन सल्लाह दिन्छन् । कोरोना केही होइन भन्ने भ्रम नपाल्न आग्रह गर्दै उनले सचेतना अपनाए कोरोनाले त्यत्तिकै आक्रमण नगर्ने बताउँछन् । ‘कोरोना केही होइन भन्नेहरुलाई सामान्य रुँघा खोकी लाग्यो भने पनि कोरोना हो कि भनेर डराउँछन् ।’-श्रेष्ठले भने ‘हामीले सोँचेजस्तो कोरोनालाई कम्जोर आँकेर हुँदैन, यसलाई व्यवास्ता गर्यौ भने अवस्था थप भयावह हुन सक्छ ।’