छैठौं मिस्टर हिमालय विजेता (२०७३) : अशोक महर्जन

अशोक महर्जनको जन्म वि.सं. २०३६ सालमा काठमाडौं- २६ तहनानीमा भएको थियो । साथीहरूको संगतमा लागेर उनले व्यायाम गर्न सुरु गरे । व्यायाम गरेर शरीर सुगठित बनाएका उनी साथीहरुका सल्लाह मान्दै २०६२ सालतिर उनी वैदेशिक रोजगारीका लागि जिम ट्रेनरका रुपमा साउदी अरबतिर लागे । झण्डै सात वर्ष जति त्यहाँ काम गरेपछि उनी नेपाल फर्किए ।

उनको पहिलो शारीरिक सुगठन प्रतियोगिता नेपाल व्यायाम मन्दिरद्वारा आयोजित दशौं धर्म श्री शारीरिक सुगठन प्रतियोगिता थियो । वि.सं. २०६१ सालमा आयोजित मिस्टर बागमती शारीरिक सुगठन प्रतियोगितामा उनले ७० केजी तौल समूहबाट प्रतिनिधित्व गर्दै कास्य पदक जित्न सफल भएका थिए । यस खेलमा यो उनको पहिलो पदक थियो । धर्मश्री राष्ट्रव्यापी खुला शारीरिक सुगठन प्रतियोगिताको १३ औं, १४ औ र १५ औं संस्करणमा समेत उनले लगातार सहभागिता जनाए ।

२०७१ सालमा नेपाल शारीरिक सुगठन तथा फिटनेश संघको आयोजनामा भएको पाँचौं मिस्टर हिमालय शारीरिक सुगठन प्रतियोगितामा उनी सहभागी भएर रजत पदक प्राप्त गरेको उनी बताउँछन् । काठमाडौं जिल्ला शारीरिक सुगठन संघको आयोजनामा वि.सं. २०७३ भाद्र २५ गते भएको प्रथम Mr. Kathmandu शारीरिक सुगठन प्रतियोगितामा उनी ७० केजी तौल समूहमा भाग लिँदै कास्य पदक जिते । वि.सं. २०७३ चैत्र २५ गते नेपाल शारीरिक सुगठन तथा फिट्नेस संघद्वारा आयोजित छैठौं मिस्टर हिमालय राष्ट्रव्यापी शारीरिक सुगठन प्रतियोगितामा ८९ प्रतिस्पर्धालाइ पछि पार्दै अशोक च्याम्पियन बनेका थिए ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको उक्त प्रतियोगितामा उनी पुरुष ७५ केजीमा पहिलो हुँदै फाइनल राउन्डमा प्रवेश गरेका थिए । उनले फाइनलमा अन्य ५ तौल समूहका विजयी खेलाडीसँग प्रतिस्पर्धा गरेका थिए । जसमा कमल भण्डारी ५५ केजी, सुजन तामाङ ६० केजी, रोजिन बज्राचार्य ६५ केजी, रामबहादुर दाहाल ७० केजी र ग्रिस महर्जन ७५ केजीमाथि लाई उनले पन्छाएका थिए । यहि संस्करण देखि त्यस प्रतियोगितामा महिला र फिजिक्स विधा समेत थप गरिएको थियो । फिजिक्स विधा पुरुष फिट्नेसको १७० सेन्टीमिटर उचाई मुनि विशुराम केसी पहिलो र १७० सेन्टीमिटर माथि रतिश वज्राचार्य पहिलो भएका थिए ।

महिला एथलेटिक फिजिकको खुला उचाई समूह तर्फ जुनु श्रेष्ठले स्वर्णपदक हात परेका थिइन् । च्याम्पियन बनेका अशोकले २ लाख ७५ हजार रुपैयाँ पाएका थिए । प्रत्येक तौल समूहमा पहिलो, दोस्रो र तेस्रो भएका खेलाडीलाई पदकसहित २५ हजार, १५ हजार र १० हजार रुपैयाँ नगदबाट सम्मानित भएका थिए । उनले ७५ केजीमा पहिलो भए बापत थप २५ हजार प्राप्त गरे ।

वि.सं. २०७५ मा बुल्समेन पोखराको आयोजनामा पोखरामा भएको तेस्रो बुल्समेन शारीरिक सुगठन प्रतियोगितामा ७५ केजी तौल समूहमा सहभागी भएर उनले कास्य पदक प्राप्त गर्न सफल भए । अशोक महर्जनले राष्ट्रिय मात्र नभएर अन्तर्राष्ट्रियस्तरका समेत शारीरिक सुगठन प्रतियोगितामा सहभागिता जनाएका छन् । जसमध्ये २०१७ मा कोरियामा सम्पन्न ५१ औं एसियाली शारीरिक सुगठन प्रतियोगितामा उनी ७० केजी तौल समूहमा सहभागी भई दसौं स्थान प्राप्त गर्न सफल भए ।

वि.सं. २०७६ काठमाडौंमा सम्पन्न १२ औं दक्षिण एसियाली शारीरिक सुगठन च्याम्पियनसिपमा सिनियर पुरुष बडीबिल्डिङको ७५ केजीमा उनले कास्य पदक हात पारेका थिए । हाल काठमाडौं १५ चमतिमा बसोबास गर्ने उनी प्रोटिन हाउस साइट्रेक न्युट्रिसनको ब्रान्ड एम्बेसडर हुन् । शारीरिक सुगठनमा लागेर उनले गरेको योगदानको सम्मान गर्दै नेपाल शारीरिक सुगठन तथा फिटनेश संघ तथा काठमाडौं जिल्ला शारीरिक सुगठन संघले उनीलाई सम्मान समेत गरिसकेको उनी बताउँछन्।

हाल उनी द वर्क आउट स्टेशन र बज्र ननिता व्यायामशाला ट्रेनरका रूपमा कार्यरत छन् । आफ्नो शारीरिक पोजहरु मध्ये उनलाई साइड चेष्ट मन पर्छ । अफ सिजनमा घरमा पाकेका सामान्य खाना रुचाउने उनी गेम सिजनमा भने दैनिक अण्डाको सेतो भाग बिस बट्टा, हरियो सागपात गेडागुडी, चिकेन ब्रेष्ट पिस र भात २०० ग्राम खाने गरेको बताउँछन् ।