शारीरिक सुगठन खेलका चम्किला तारा सचित प्रधान

शारीरिक सुगठन खेलको नालीवेली तयार गर्ने क्रममा मैले जति जति तथ्यहरु संकलन गर्दै गएँ, एउटा खेलाडीको तथ्यांक देखेर म छक्क परे । कसरी एक जना खेलाडीले झन्डै दुई दशक नेपाली शारीरिक सुगठन खेलमा एक क्षत्र राज गर्न सफल भए । उनि अरु कोही नभएर सचित प्रधान थिए । १६ वर्षको कलिलो उमेर देखि नै डमबेल र वेटहरुसंग मित गाँसेका सचित प्रधान, शारीरिक सुगठन खेलको नेपाली आकाशका उज्याला ताराको रुपमा परिचित छन् ।

वि.सं. २०३२ साल फाल्गुन १२ गते काठमाडौंको मरु टोलमा जन्म भएको थियो । उनले व्यायाम शुरु गरेको केहि समय मै वि.सं. २०५२ को मिष्टर कान्तिपुर शारीरिक सुगठन प्रतियोगिता जितेर आफ्नो उपाधि यात्रा शुरु गरे । त्यस पछि उनले पछाडी फर्कनु परेन । ६३ र ६६ सालका भएको दोस्रो र तेस्रोमा मि. हिमालयमा स्वर्ण पदक तथा ६६ र ७१ सालमा भएको तेश्रो र चौथो मि. हिमालयमा बजन समुहबाट स्वर्ण पदक सहित उपाधि समेत हातपारे। वि.सं. २०५३ सालमा भएको ५ औं देखि वि.सं. २०७१ सम्म तेह्रौ धर्म श्री लगातार ६० के जी बजन समुहमा स्वर्ण पदक ल्याउने उनि एक्ला खेलाडी भएको उनले बताए । त्यस पछिका वि.सं. २०७० सालमा भएको १४औ राष्ट्रिय शारीरिक सुगठन प्रतियोगितामा समेत स्वर्ण पदक प्राप्त गरे ।

नेपालमा आयोजना हुने साना देखि मि। हिमालय र धर्म श्री जस्ता ठुला प्रतियोगिताहरुका समेत उपाधि पटक पटक उनले उचाली सकेका छन् । नेपालमा शारीरिक सुगठनमा पहिलो पटक अन्तराष्ट्रिय पदक भित्याउने श्रेय समेत उनलाइ जान्छ । वि.सं. २०५६ सालमा भारतको नासिकमा सम्पन्न 1st South Asian Bodybuilding Championship मा उनि लगायत जीवन गिरी र राजु दिवाकरले कास्य पदक जितेर शारीरिक सुगठन खेलको अन्तराष्ट्रिय पदक यात्राको शुरुवात गरे । त्यस पछी पनि उनले नेपाल, भारत र भुटानमा सम्पन्न दक्षिण एशियाली शारीरिक सुगठन प्रतियोगिताहरु दोश्रो, तेश्रो, चौथो, सातौ, आठौ र नवौं सस्करणमा तथा दुवाइ र ओमानमा भएको पहिलो र दोश्रो विश्व शारीरिक सुगठन प्रतियोगिताहरु सहभागिता जनाएका थिए ।

साथै उनले इण्डोनेशिया र ओमान मा भएको एशियाली शारीरिक सुगठन प्रतियोगिता समेत सहभागी भई सबै खेलमा कुल जम्मा जम्मी तीन स्वर्ण र तिन कास्य पदक अन्तर्राष्ट्रिय खेलबाट ल्याउन सफल भएको उनले बताए । राष्ट्रिय होस वा अन्तर्राष्ट्रिय प्रतियोगिता प्राय खेलबाट उनी रित्तो हात कहिल्यै फर्कनु परेन । समान्यतया बडी बिल्डरहरु प्रतियोगिताहरु नभएको समयमा खानपानमा खासै परहोज नगर्ने चलन हुन्छ तर उनि जुनसुकै बेला खानपिनमा असाध्यै परहेज गर्ने गरेको उनका सहकर्मी ज्ञान नारायण महर्जन बताउँछन् । वि.सं. २०७१ सालमा भएको ५ औं मिष्टर हिमालय प्रतियोगितामा भएको निर्णयबाट उनको चित्त दुख्यो । त्यस पछिका प्रतियोगितामा सहभागीता जनाउन मन नलागेको उनले बताए ।

शारीरिक सुगठन प्रेमीहरु नेपाली बडी बिल्डरहरु स्मरण गर्दा उनको नाम आज पनि निकै गर्व र सम्मान का साथ लिने गरिन्छ । हामी पनि प्रतिभाशाली अनुशासित खेलाडी सचित प्रधान फेरि स्टेजमा नेपाली संगीतको धुनमा आफ्ने बलिष्ठ शरीर प्रदर्शन गर्दै उपाधी जितेको हेर्न चाहन्छौ । सम्पुर्ण शारीरिक सुगठनलाइ माया गर्ने नेपालीहरु उनको पुन आगमनको प्रतिक्षारत छन् ।