पाल्पाको तिनाउमा पठन–पाठन हुने

तिनाउ । पाल्पाको तिनाउ गाउँपालिकामा रहेका विद्यालयहरुमा सामाजिक दूरी कायम राखी पठन-पाठन सञ्चालन गरिने भएको छ । गाउँपालिकामा विद्यालयका प्रधानाध्यापकहरुको संयुक्त बैठकपछि पढाउन मिल्ने ठाउँमा दूरी कायम गरेर नियमित पढाई गर्ने र बढि विद्यार्थी भएका विद्यालयमा २ सिफ्ट गरी कक्षा सञ्चालन गर्ने निर्णय भएको हो । विद्यालयमा आउँदा विद्यार्थी र शिक्षकले अनिवार्य रुपमा मास्क लगाउनुपर्ने, विद्यालयमा साबुन पानी र सेनिटाइजरको व्यवस्था हुनुपर्ने बताइएको छ ।

यसैगरी तिनाउ गाउँपालिका भित्रका शिक्षक तथा कर्मचारीलाई विद्यालय समयमा अनिवार्य रुपमा विद्यालय उपस्थित हुन निर्देशन दिईएको छ । तिनाउ गाउपालिका भित्रका प्रध्यानाध्यापकहरुको बैठकमा पालिकाका अध्यक्ष तथा गाउ शिक्षा समिति निर्देशक ओम बहादुर घर्ति मगरले उक्त निर्देशन दिए । कोरोना महामारीका कारण लकडाउन भएपछि बन्द भएका विद्यालयहरु केहि समय अघिबाट टोलटोलमा विद्यार्थी भेला गरी अनौपचारीक तवरले पढाई सञ्चालन गर्दै आएका थिए । तर केहि शिक्षकहरु हालसम्म पनि विद्यालयमा उपस्थित नभएको गुनासो आएकाले उक्त निर्णय गरीएको घर्ति मगरले बताए ।

तिनाउका शिक्षकहरुले श्रावण मसान्त भित्र सबै सम्पति विवरण पेश गर्नुपर्ने भएको छ । यसका साथै बैठकमा सबै कार्यसम्पादन मूल्यांकन १ महिनाभित्र गाउपालिका कार्यालयमा पेश गर्न निर्देशन जारी गरिएको छ । बैठकमा उपस्थित सम्पूर्ण प्रअहरुले आ–आफ्नो विद्यालयको गतिविधि बताएका थिए । गाउँपालिका उपाध्यक्ष दयमन्ति थापा प्रशासन शाखा प्रमुख यादव अर्याल, दोभान माविका प्रअ सूर्य पौडेल, मस्याम माविका प्रअ कृष्णप्रसाद पान्डेय लगाएतले लकडाउन र कक्षा सञ्चालनका बारेमा धारणा राखेका थिए ।

सामाजिक विकास शाखा संयोजक राजेश श्रेष्ठ र विद्यालय निरिक्षक लक्ष्मी कुवरले लामो समय अन्द शैक्षिक संस्थाहरुलाई खुलाउँदा आवश्यक सम्पूर्ण स्वास्थ्य मापदण्ड पूरा गरी कक्षा सञ्चालन गर्नुपर्नेमा जोड दिए । सो अवसरमा पालिका भित्रका अनाथ, अशक्त तथा असाहाय बालबालिकाहरुलाई ड्रेस, पुस्तक तथा शैक्षिक सामाग्री वितरण गरिएको छ ।