तपाईंले दैनिक खाने रायोको सागमा के पाइन्छ ?

करेसाबारी र बजारदेखि भान्सासम्म हाम्रो जम्काभेट रायोको सागसँग हुन्छ । जुन कुनै सिजनमा पनि रायोको साग उपलब्ध हुनेगर्छ । खासगरी जाडो याममा सजिलै उपलब्ध हुने, चाँडो पाक्ने र स्वादिलो पनि हुने रायोको साग सबैका लागि प्रिय खाद्यवस्तु बनेको छ ।

त्यसैले रायोको सागको तरकारी धेरैको रोजाइमा पर्ने गर्छ । तर सधैं खाइरहे पनि रायोको सागबारे हामीलाई कम नै जानकारी हुनसक्छ । संसारभर पाइने अनकौँ तरकारीमध्ये दोस्रो बढी पोषणयुक्त तरकारीमा रायो पर्छ । तसर्थ, रायो स्वास्थ्यका दृष्टिले झनै लाभदायक छ । यसलाई पकाएर, काँचै वा सिजनिङ गरेर खान सकिन्छ । धेरै पकाउँदा भने यसमा रहेका पोषण तत्व नष्ट हुन सक्छ ।

यहाँ रायोको सागका केही फाइदाहरु उल्लेख गरिएको छ-

• यसमा भिटामिन ए प्रशस्त मात्रामा पाइन्छ जसले रतन्धो, पुरानो बाथ, कफ आदिबाट बचाउन सक्छ ।
• यसमा पाइन्ने भिटामिन ए, सी र केयुक्त तत्वले हाम्रो शरीरमा एन्टिअक्सिडेन्टको काम गर्छन् ।
• रायोको सागमा पाइने फोलिक र म्याग्नेसियमले शरीरमा रहने विभिन्न विकारयुक्त वस्तुलाई बाहिर निकाल्छ ।
• रायोको दाना पिसेर तरकारीमा हालेर खाँदा पाचन पक्रिया बलियो बन्छ । यसले भोक नलाग्ने समस्यासमेत हटाउँछ ।
• शरीरमा भिटामिन केको कमी भएमा गर्भवतीलाई वाकवाकी बढी नै लाग्ने, टाउको दुख्नेजस्ता समस्या हुन्छ । रायोको सागमा भिटामिन के प्रचुर मात्रामा पाइने भएकाले गर्भवतीलाई खुवाउँदा समस्या हल हुन्छ ।
• जाडोमा बाथका रोगीलाई हड्डी दुख्ने समस्या हुन्छ, खासमा बढी बुढाबुढीलाई । रायोमा पाइने कपरले यो समस्या हल गर्छ।
• यो भिटामिन सीको पनि राम्रो स्रोत भएकोले रुघाखोकी लागिरहने मानिसका लागि उपयोगी हुन्छ ।
• रायोले पिसाबनलीमा हुने पत्थरीलाई कम गर्नुका साथै क्यान्सरको जोखिमलाई कम गर्छ ।-साझापोष्ट