बुटवलमा विहिबारदेखि १८ औँ संस्करणको मनमोहन स्मृतिकप फुटबल

बुटवल । १८ औं संस्करणको मनमोहन स्मृति वडा स्तरीय नकआउट फुटबल प्रतियोगिता २०८२ भोली (विहिबार) देखि सुरु हुँदै छ । युवा खेलाडीहरुलाई प्लेटफर्म दिने गरि राष्ट्रिय युवा संघ नेपाल बुटवल उपमहानगरपालिका कमिटी रुपन्देहीको आयोजनामा भोली बैशाख १८ गते ९भोली० बाट प्रतियोगिता हुने भएको हो ।

प्रतियोगिताको टिम दर्ता, खेलमैदानको मर्मत लगायतका सबै तयारी पुरा भएको संघका नगर अध्यक्ष गणेश बोहराले जानकारी दिए । प्रतियोगिताको उपाधि विजेता टिमले नगद १ लाख ११ हजार १ सय ११ रुपैया, कप, मेडल, प्रमाणपत्रबाट पुरस्कृत हुने उनले बताए । उपविजेता टिम नगद ५५ हजार ५ सय ५५ रुपैया, कप, मेडल, प्रमाणपत्र तथा विधागत रुपमा उत्कृष्ट खेलाडीहरुलाई समेत नगदबाट पुरस्कृत गरिने उनले बताए । प्रतियोगितामा नगरका १६ टिमले प्रतिस्प्रर्धा गर्ने भएका छन ।

बुटवलमा प्रतियोगिताको खेल तालिका सार्वजनिक गर्दै राष्ट्रिय युवा संघ नेपाल केन्द्रीय सदस्य कल्पना पाडे मगरले खेल क्षेत्रको विकासमा युवाको योगदान महत्वपूर्ण रहेको बताईन । ‘सबैबाट सहयोग र सद्भावबाट यो अघि बढ्ने हो ।’-उनले भनिन ।

कार्यक्रममा नेकपा एमाले पार्टी, बुटवल नगर कमिटि अध्यक्ष शोभाखर पोखरेलले खेल मार्फत युवाहरुलाई एकतावद्ध, अनुशासित र रचनात्मक कार्यमा अघि बढाउन सकिने बताए ।

कार्यक्रममा नेकपा एमाले बुटवल नगर कमिटिका उपाध्यक्ष माधव खनाल, युवा संघ केन्द्रीय सदस्य मनोज गौचनले प्रतियोगिताको सफलताको शुभकामना दिदै सधै साथ सहयोग रहने बताए । १७ औं संस्करणमा वडा नं ६ विजेता रहेको छ । उद्घाटन खेल वडा नं ६ र वडा नं १६ का बीचमा हुने भएको छ ।