काठमाडाैं । जनमत पार्टी र नागरिक उन्मुक्ति पार्टीबीच यही वैशाख १७ गते पार्टी एकीकरण घोषणा हुने भएको छ। जनमत पार्टीका प्रवक्ता डा शरदसिंह यादवले पार्टी एकीकरणको मिति तय भएको जानकारी गराका हुन्।
उनका अनुसार पार्टी एकीकरणका विषयमा थप छलफल गर्न पार्टीको केन्द्रीय कार्यकारिणी समितिको बैठक यही १६ गते मंगलबारका लागि बोलाएको छ। बेलुका ६ बजे मध्यबानेश्वरस्थित पार्टीको केन्द्रीय कार्यालयमा बस्ने बैठकमा आआफ्ना नागरिकता र मतदाता परिचयपत्र लिएर उपस्थित हुन जनमतले नेताहरूलाई निर्देशन दिएको छ।
बुधबार नेपाल प्रज्ञा प्रतिष्ठानमा हुने पार्टी एकता घोषणा कार्यक्रममा सबै केन्द्रीय सदस्य, भ्रातृ तथा शुभेच्छुक संगठनका सदस्यहरूसहित उपस्थित हुन जनमतले भनेको छ।
एकीकरणपछि बन्ने पार्टीको नाम, पार्टीको झण्डा, पार्टीको नेतृत्वमा पनि करिब सहमति बनिसकेको नेताहरूले बताएका छन्। नयाँ पार्टीको नाम नागरिक जनमत पार्टी टुंगो लागेको छ।
एकीकरणपछि बन्ने पार्टीको अध्यक्षमा हालको जनमत पार्टीका अध्यक्ष सीके राउत रहने समझदारी बनेको छ भने नागरिक उन्मुक्ति पार्टीका संरक्षक रेशम चौधरी नयाँ पार्टीको पनि संरक्षक रहने तथा नागरिक उन्मुक्तिकी अध्यक्ष रञ्जिता श्रेष्ठ सहअध्यक्ष रहने छिन्।
विस २०७७ मा सीके राउतको नेतृत्वमा जनमत पार्टी र विस २०७८ पुस १९ गते नागरिक उन्मुक्ति पार्टी गठन भएका थिए।
हाल संसद्मा जनमतका ५ र नागरिक उन्मुक्ति पार्टीका ४ सांसद छन्।
युनिकोड
मिति रूपान्तरण
ग्लोबल आवाज
प्रतिक्रिया