आतंककारीको आक्रमणमा ज्यान गुमाएका सुदीपको शव नेपाल ल्याइँदै, आजै अन्त्यष्टी गरिने

बुटवल । छिमेकी मुलुक भारतको कास्मिरमा भएको मङ्गलवार आतंकवादीको आक्रमणमा मृत्यु भएका बुटवलका सुदीप न्यौपानेको शव आजै बुटवल ल्याएर अन्त्येष्टि गरिने भएको छ ।

आमा बहिनी र ज्वाइँसहित घुमघामका लागि कास्मिर गएका बुटवलका युवा सुदीप न्यौपानेको उक्त हमलामा ज्यान गएको थियो। आतंककारीहरूले पर्यटकलाई लक्षित गर्दै गरिएको हमलामा उनी पनि मारिएका हुन्।

सुदीपको पार्थिव शरीर आज बिहान सुनौली नाका हुँदै नेपाल ल्याउन लागिएको हो। परिवार स्रोतका अनुसार पार्थिव शरीर आजै बुटवलको कालिकानगरस्थित निवासमा ल्याइँदै छ । आजै उनको अन्त्येष्टि गरिने कार्यक्रम रहेको पारिवारिक स्रोतले जनाएको छ।

अहिले सुदीपका काका तथा वडा अध्यक्ष दधिराम न्यौपानेसहित परिवारका अन्य सदस्यहरू शव बुझ्नका लागि सुनौलीमा छन्। घटना विवरण संकलन गर्न नेपाल प्रहरी तथा सम्बन्धित निकायहरूले समन्वय गरिरहेका छन्।