यु-१९ विश्वकप एसिया छनोटमा नेपालको विजयी सुरुवात

काठमाडौं । आईसीसी यु-१९ विश्वकप क्रिकेटको एसिया छनोटअन्तर्गत आफ्ना् पहिलो खेलमा नेपालले युएइलाई डिएसएल पद्धतिबाट पराजित गरेको छ । मुलपानी क्रिकेट मैदानमा नेपालले दिएको २०१ रनको लक्ष्य पछ्याएको युएईले ३६ ओभरको खेल सकिँदा ७ विकेट गुमाएर १७१ बनाएको थियो ।

सोही समयमा वर्षा भएसँगै खराब प्रकाशका कारण डिएलएस पद्धतिमार्फत नतिजा निकालिएको हो । युएईका लागि यायिन किरण राईले अविजित १०४ रन बनाएपनि जितका लागि पर्याप्त हुन सकेन । त्यसअघि मुलपानी क्रिकेट मैदानमा पहिला ब्याटिङ गरेको नेपालले निर्धारित ४० ओभरमा ९ विकेट गुमाएर २०० रन बनाएको थियो । नेपालका लागि कप्तान नरेन भट्टले अर्धशतकीय इनिङ खेले ।

नरेनले ७५ बलमा सर्वाधिक ६७ रन बनाए । दिलसाद अलीले ३४ र साहिल पटेलले ३२ रनको योगदान दिए । बलिङमा यूएईका उदिस सुरीले सर्वाधिक ३ विकेट लिए । मैदान भिजेको कारण केही ढिला सुरु भएको खेल ४० ओभरमा छोट्याइएको थियो ।पहिलो जितसँगै नेपालले २ अंक जोडेको छ ।

यसैगरी माथिल्लो मूलपानीमा भएको खेलमा अफगानिस्तानले ओमानलाई पराजित गर्दै २ अंक बटुलेको छ ।