दोस्रो तानसेन महोत्सव हावाहुरी र वर्षाका कारण प्रभावित

पाल्पा । तानसेनमा जारी दोस्रो तानसेन महोत्सव हावाहुरी र वर्षाका कारण प्रभावित भएको छ । बुधबार दिउँसोदेखि परेको वर्षा र रातीको हावाहुरीका कारण महोत्सव प्रभावित बनेको हो ।

हिजो कार्यक्रमको तयारी भइरहेको बेला अचानक वर्षा र हावहाहुरी चलेपछि महोत्सवमा भाग दौड मच्चिएको थियो । कार्यक्रममा आफ्नो प्रस्तुती देखाउन आएका स्थानीयदेखि राष्ट्रियस्तरका  कलाकारहरु समेत आफ्नो कला देखाउनबाट बञ्चित भए । असिनासहित वर्षा भएपछि महोत्सव हेर्न भेला भएका हजारौं बाल बच्चादेखि बुढापाका बीच भागदौड मच्चिएको थियो । वर्षाका कारण सांस्कृतिक कार्यक्रम स्थगित गरि आज सञ्चालन गर्ने तयारीमा आयोजक थिए ।

तर बुधबार राती नै ठूलो हावाहुरी र वर्षाका कारण महोत्सवस्थलमा बनाइएका स्टेज, स्टल, प्रवेशद्वार, घेरबारलगायत ढलेका छन् । जसले गर्दा  महोत्सव नै अनिश्चित बनेको छ । महोत्सवस्थलमा राखिएका विभिन्न स्टलका सामान समेत हावाले उडाएको व्यापारीहरुले बताए । हावाहुरीले मानवीय क्षती भने नभएको प्रहरीले जनाएको छ ।

वर्षा र हावाहुरीका कारण महोत्सवस्थलमा ठूलो क्षति पुगेकाले पुनः नयाँ संरचना निर्माण गरेर मात्र महोत्सव सञ्चालन गरिने महोत्सव पाल्पा व्यापार सङ्घका अध्यक्ष विष्णुु बहादुर कार्कीले बताए । उनका अनुसार महोत्सवमा बनाइएका स्टेज, स्टल, प्रवेशद्वारमा क्षति पुगेको र क्षति यकिन विवरण संकलन गर्ने काम भइरहेको छ । चैत २२ गतेदेखि सञ्चालन गरिएको महोत्सव वैशाख ३ गतेसम्मका लागि तय भएको थियो ।