रुपन्देही आएर उपेन्द्रले भने : काँग्रेस-कम्युनिष्टकै कारण मुलुकमा अस्थिरता

भैरहवा । जनता समाजवादी पार्टी (जसपा), नेपालका अध्यक्ष उपेन्द्र यादवले नेपालमा राजनीतिक अस्थिरताको कारण काँग्रेस-कम्युनिष्ट भएको आरोप लगाएका छन् । उनले राजनीतिक अस्थिरताकै कारण मजबुत सरकार बन्न नसकेको बताए ।

पार्टी निकट समाजवादी विद्यार्थी युनियन, नेपालको प्रथम राष्ट्रिय महाधिवेशनलाई शनिबार रुपन्देहीको भैरहवामा सम्बोधन गर्दै अध्यक्ष यादवले मजबुत सरकार बनाउँछौं भनेर काँग्रेस–कम्युनिष्ट मिले पनि यो सरकार असफल भएको दावी गरे । उनले संविधान जारी भएपछि मुलुकमा ९ वर्षमा १३ वटा सरकार बनेको बताए । 

अध्यक्ष यादवले नेपालको वर्तमान सरकार गठन अघि भ्रष्टाचार नियन्त्रण गर्ने र सुशासन दिने भने पनि नेपालको इतिहासमा सबैभन्दा धेरै भ्रष्टाचार, कुशासन र लुटतन्त्र अहिले भइरहेको उनले दावी गरे । ‘यसभन्दा पहिला यस्तो कहिल्यै थिएन्, उनले भने–काँग्रेस–कम्युनिष्टको शासनमा व्यवस्थाकाविरुद्ध धारणा बनिरहेको छ । काँग्रेस-कम्युनिष्टले लोकतन्त्रको रक्षा गर्ने तागत राख्दैनन् । ’ 

पूर्वउपप्रधानमन्त्री समेत रहेका यादवले जनताको आक्रोश बढिरहेको बताए । उनले संविधान संशोधन गर्नका लागि यो सरकार बनेको भनिए पनि २०८७ सालमा गर्ने कुरा बेइमानीपूर्ण भएको बताए । ‘यो सरकारको आयू नै २०८७ सम्म छैन, ’उनले भने । कृषिको आधुनिकरण र उद्योग-कलकारखाना स्थापना नभएसम्म मुलुकमा गरीबी र बेरोजगारी अन्त्य हुन नसक्ने उनले बताए ।

उनले विकासको सबैभन्दा ठूलो आधार शिक्षा भएको बताए । दुनिया बदल्ने सबैभन्दा ठूलो तागत शिक्षा भएको उनले बताए । जीवनमा परिवर्तन ल्याउन संघर्ष गर्नुपर्ने उनको भनाइ छ । उनले निरंकुशताको अन्त्य र लोकतन्त्रका लागि विद्यार्थी अग्रमोर्चामा रहेर आन्दोलनमा होमिएको बताए । विद्यार्थी सडकमा उत्रिदा क्रान्ति र परिवर्तन भएको उनको भनाइ छ । उनले ३५ वर्षसम्म सरकार चलाएका काँग्रेस-कम्युनिष्टले शिक्षाको विकास गर्न नसकेको दावी गरे ।मुलुकमा सुशासन, अर्थतन्त्र सुधार, राम्रो शिक्षा र स्वास्थ्य आवश्यक रहेको र यो काँग्रेस-कम्युनिष्टबाट हुनै नसक्ने उनले बताए । जसपा नेपालले संसद् र सडक दुवैबाट संघर्ष गर्ने अध्यक्ष यादवले बताए ।

त्यस्तै जसपा नेपालका महासचिव तथा मधेश प्रदेशका संस्थापक मुख्यमन्त्री मोहम्मद लालबाबु राउतले शिक्षा नीतिमा सुधार आवश्यक रहेको बताए । उनले समयसापेक्ष शिक्षा आवश्यक रहेको बताए । पार्टीका महासचिव रामकुमार शर्माले वर्तमान सरकारले जनताको समस्या समाधान गर्न नसकेको बताए । उनले जसपा नेपालले दुई दलीय व्यवस्था नमान्ने जिकिर गरे ।

जसपा नेपालकी उपमहासचिव तथा प्रतिनिधि सभा सदस्य रेखा यादवले समावेशी समानुपातिक प्रतिनिधित्वविरुद्ध षडयन्त्र भइरहेको बताइन् । पार्टीका केन्द्रीय सदस्य विन्देश्वर यादव ९बिक्की०ले उत्पीडित समुदायलाई अधिकार दिलाउन जसपा नेपाल अघि बढेको बताए । केन्द्रीय सदस्य बलराम महतोले महाधिवेशनले सर्वसम्मत नेतृत्व चयन गर्ने विश्वास व्यक्त गरे ।