बुटवलमा भोलीदेखि महिला फुटबल : आइपुगे चर्चित राष्ट्रिय खेलाडीहरु

बुटवल । बिस पचहत्तर युवा परिवार, बुटवलको आयोजनामा भोली (शनिबार)बाट बुटवलमा प्रथम उपमेयर कप नकआउट फुटबल प्रतियोगिता–२०८१ हुँदैछ । चैत ३० गतेसम्म चल्ने  प्रतियोगिताको तयारी पूरा भएको आयोजक क्लबले जनाएको छ । 

सिद्देश्वरी लालकुमारी माविको खेलमैदानमा हुने प्रतियोगितामा आयोजक बिसपचहत्तर युवा परिवार, सुनवल नगरपालिका, बिरगंज युथ एकेडेमी, बसन्त युनाईटेड क्लब चितवन, हेटौडा फुटबल एकेडेमी, राईजिङ स्टार युवा क्लब कपिलवस्तु, वालिङ, एमएससी भारतको टिम सहभागी हुँदैछन् । प्रतियोगिताको उद्घाटन खेल शनिबार दिउँसो ३ बजे आयोजक बिसपचहत्तर युवा परिवार र सुनवल नगरपालिकाका बीच हुने छ । 

बुटवल उपमहानगरपालिकाको आर्थिक सहयोगमा हुने प्रतियोगिताका लागि १ हजार जना अट्ने अस्थाई प्याराफिट निमार्ण गरिएको अध्यक्ष सुरेन्द्र थापाले बताएका छन् । प्रतियोगितामा सहभागी हुन आउने टिमहरु बुटवल आइसकेको र टिममा राष्ट्रिय खेलाडीहरु विभिन्न टिमबाट खेल्ने उनले बताएका छन् । बुटवलमा यो स्तरको महिला फुटबल प्रतियोगिता पहिलो पटक आयोजना हुन लागेको क्लबका सचिव दिपक गुरुङले दावी गरेका छन् । प्रतियोगितामा फुटबल प्रेमीहरुले नेपालका चर्चित तथा राष्ट्रिय महिला खेलाडीहरुलाई मैदानमा देख्न पाउने उनको भनाई छ । 

प्रतियोगिताको उपाधि विजेता टिमले नगद १ लाख रुपैयाँ, कप, मेडल, प्रमाणपत्र तथा उपविजेता टिमलाई नगद ५० हजार रुपैयाँ, कप, मेडल, प्रमाणपत्रबाट पुरस्कृत गरिने छ । यसैगरि विधागत रुपमा सर्वोत्कृष्ट खेलाडीलाई २५ हजार रुपैयाँसहित कप तथा ४ जना उत्कृष्ट खेलाडीहरुलाई नगद १० हजारसहित कपबाट पुरस्कृत गरिने छ । प्रतियोगिता सम्पन्न गर्न करिव २० लाख खर्च हुने अनुमान गरिएको छ ।