तिलोत्तमाको सिद्धार्थ माविमा कक्षा १२ को परीक्षामा सहभागी हुने विद्यार्थीलाई बिदाई

बुटवल । तिलोत्तमाको सिद्धार्थ इङ्ग्लिस बोर्डिङ स्कुलबाट कक्षा १२ को बोर्ड परीक्षामा सहभागी हुन गईरहेका विद्यार्थीहरुलाई शुक्रबार एक कार्यक्रमका बीचमा बिदाई गरिएको छ । कार्यक्रममा शुभकामना मनतव्य राख्दै विद्यालयका अध्यक्ष प्राध्यापक रामलाल श्रेष्ठले विद्यार्थीहरुलाई जीवनलाई सरल, सहज तथा सर्वोत्तम बनाउनका लागि ईमानदारीता, धैर्यता, लगनशीलता, कडा परिश्रमलाई  सधैंभरि पालना गर्नका लागि सुझाव दिए । साथै व्यक्ति, समाज र राष्ट्रका  हरेक पक्षको विकासको मुख्य आधार शिक्षा रहेकोले जस्तोसुकै परिस्थितिमा पनि अध्ययनलाई अगाडि लैजानु पर्नेमा उनको जोड थियो । 

कार्यक्रममा शुभकामना मनतव्य दिँदै विद्यालयका प्रबन्ध निर्देशक  बावुराम खनालले कक्षा १२ को परीक्षामा मात्र नभई जीवनका हरेक पक्षमा विद्यार्थीले सफलता प्राप्त गरेको देख्न, सुन्न, हेर्न सधैंभरि तयार रहेकोले उक्त अपेक्षा पूरा गर्नका लागि विद्यार्थीलाई   सुझाव दिए । विद्यालयका प्राचार्य यम बहादुर रानाले सिद्धार्थका विद्यार्थीले देश तथा विदेशमा आफूलाई सर्वोत्कृष्ट विद्यार्थीका रुपमा स्थापित गरिसकेको अवस्थामा त्यसको निरन्तरता र थप रचनात्मक उपलब्धि हाशिल गर्नका लागि विद्यार्थीलाई शुभकामना दिए । 

कार्यक्रममा उपस्थित अतिथिहरुलाई कक्षा ११ का छात्रा ऋतु क्षेत्रीले स्वागत गरेकी थिइन् भने छात्र ऋषव पौडेलको अध्यक्षतामा कार्यक्रम भएको थियो । कार्यक्रम कक्षा ११ का विद्यार्थीको आयोजना र सहजीकरणमा सम्पन्न भएको शिक्षिका नितु पोखरेलले जानकारी दिइन् ।