नयाँ वर्षलाई स्वागत गर्न बुटवलमा लाइभ म्युजिकसहित 'सडक खाना महोत्सव'

बुटवल । नेपाली नयाँ वर्ष २०८२ लाई स्वागत गर्दै बुटवलमा सडक खाना महोत्सवको आयोजना हुने भएको छ । रेष्टुरेन्ट एण्ड बार एसोसिएसन नेपाल ९रेबन० रुपन्देहीको आयोजनामा चैत्र ३० गतेदेखि ३ दिनसम्म सञ्चालन हुने महोत्सवमा लाइभ म्युजिकसहित विभिन्न खानाका परिकारहरु रहने संस्थाकम अध्यक्ष प्रशान्त कोइरालाले जानकारी दिए । 

महोत्सव बारे जानकारी गराउन शुक्रबार बुटवलमा आयोजित पत्रकार सम्मेलनमा बोल्दै अध्यक्ष कोइरालाले नेपाली नयाँ वर्षको महत्वलाई जोड दिनेगरी कार्यक्रमको परिकल्पना गरिएको बताए । बुटवलको कालिका पथमा तीन कुने चोकदेखि शिवालय मन्दिरसम्म स्टल राखेर आयोजना गरिने महोत्सवमा ५० बढी स्टल रहने अध्यक्ष कोइरालाले बताए । 'सडकमै खाऔ, सडकमै रमाऔं' भन्ने मूल नाराकासाथ आयोजना गरिने महोत्सवमा तिर्सना गुरुङ, चक्र एणड अमात्य, प्रतीक्षा एण्ड टमको साँगेतिक प्रस्तुती रहने आयोजकले जनाएको छ । विशेष गरि युवा पुस्तालाई लक्षित गरि आयोजना गरिने महोत्सवमा खानाका परिकार बाहेक अन्य उत्पादनका स्टल पनि सहभागी हुने बताइएको छ । 

५ लाख बढी दर्शकले अवलोकन गर्ने लक्ष्य राखिएको महोत्सव सम्पन्न गर्नका लागि २५ लाख खर्च अनुमान गरिएको उपाध्यक्ष लक्ष्मण श्रेष्ठले जानकारी दिए । महोत्सवमा सुरक्षा व्यवस्थाका लागि संस्थाका सदस्य तथा स्वयम् सेवकहरु, ३० जना बढी निजी सेक्युरिटी फोर्स तथा नेपाल प्रहरीसहितका सरकारी सुरक्षा निकायहरुसँग आवश्यक समन्वय गरिएको सचिब अतित थापाले जानकारी दिए । महोत्सवको समयमा सवारी आवागमनलाई समेत असर ध्यानमा राखी दिनभर सडक खुला राखिने र रातको समयमा मात्रै सवारीका साधनलाई निषेध गरिने आयोजकको तयारी छ । महोत्सवलाई व्यवस्थित बनाउन पार्किङ एरियाको खोजी गरिनुकासाथै महोत्सव सकिएपछि सडकमा हुने फोहरलाई आयोजकलेनै व्यवस्थापन गर्नेगरी तयारी गरिएको छ । महोत्सवले आन्तरिक तथा बाह्य पर्यटन प्रवर्द्धनमा टेवा पुग्ने अपेक्षा गरिएको आयोजकले जनाएको छ ।