बिरामी बढाउने नभैइ बिरामी हुन नदिने उपाय खोज्न जरुरी छ:  मन्त्री पौडेल

काठमाडौं । राष्ट्रिय आयुर्वेद पञ्चकर्म तथा योग सेवा केन्द्र बुढानिलकण्ठ काठमाडौंको सेवा शुक्रबार समुद्घाटन गरिएको छ । शुक्रबार एक विशेष कार्यक्रमकाबिच उक्त सेवाको समुद्घाटन गरिएको हो ।
उक्त सेवा कार्यक्रमको समुद्घाटनमा बोल्दै स्वास्थ्य तथा जनसंख्या मन्त्री प्रदीप पौडेलले राष्ट्रिय आयुर्वेद पञ्चकर्म तथा योग सेवा केन्द्रबाट लाभ लिन र यसलाई आयुर्वेद पर्यटन केन्द्रका रुपमा विकास गर्न स्थानियहरुको धेरै ठूलो भूमिका रहने बताएका छन् ।

उनले आयुर्वेद पञ्चकर्म तथा योग सेवा केन्द्रमा पर्यटकहरु उपचार सेवा लिनको निम्ती यहाँ आउने स्थिती बनाउन सबैले प्रयत्न गर्न जरुरी रहेको बताएका हुन् । उनले भने, ‘राष्ट्रिय आयुर्वेद पञ्चकर्म तथा योग सेवा केन्द्र बुढानिलकण्ठ काठमाडौंको सेवाबाट लाभ लिन र यसलाई आयुर्वेद पर्यटन केन्द्रका रुपमा विकास  गर्न स्थानियहरुको धेरै ठूलो भूमिका रहन्छ ।

स्थानियहरुको साथ सहयोगले नै आयुर्वेद पर्यटन केन्द्रका रुपमा विकास हुने भएकाले म त्यसको निम्ती सबैलाई अपिल समेत गर्न चाहन्छु । यो हाम्रो  क्षेत्रमा, हाम्रो  ठाउँमा यो बनेको छ । यसलाई चाँही नेपालकै पञ्चकर्मको केन्द्र अथवा पर्यटकहरु उपचार सेवा लिनको निम्ती यहाँ आउने स्थिती बनाउनका निम्ती हामी सबैले प्रयत्न गर्न जरुरी छ ।’

यसैगरी उनले उपचार कसरी गर्ने भन्ने बारेमा केही उपलब्धिहरु भए पनि त्यसले पूर्णता प्राप्त गर्न नसकेको बताए । उनले बिरामी बढाउने नभैइ बिरामी हुन नदिने उपाय कसरी खोज्न सकिन्छ त्यसअन्र्तगत कामहरु गर्न जरुरी रहेको बताए ।

उनले भने, ‘खासगरी बिरामी भएपछि उपचार कसरी गर्ने भन्ने बारेमा हामीले  केही हदसम्म बहस गरिरहेका छौं । केही उपलब्धिहरु पनि भएका छन् तर त्यसले पूर्णता प्राप्त गर्न सकेको छैन । यसरी नै  बिरामीको संख्या बढ्ने हो भने हामीले बिरामीहरुको उपचार गर्ने विषयलाई पूर्णतातिर होइन,अझ अपुग हुने स्थिती बन्छ । हामीले  बिरामी बढाउने होइन, बिरामी हुन नदिने उपाय कसरी खोज्न सकिन्छ त्यसअन्र्तगत कामहरु गर्न  जरुरी छ । हामीले  निरोगी नेपाली अथवा नेपालीलाई रोग लाग्न नदिन के के उपाय अपनाउन सकिन्छ त्यसको लागि स्वास्थ्य मन्त्रालय कोशिष गरिरहेको अवस्था छ ।’