प्रदेश राजधानी सरेपछि ‎बुटवलका व्यवसायी मर्कामाः सचेतक ढकाल

बुटवल । लुम्बिनी प्रदेशका प्रदेश सभा सदस्य तथा नेपाली काँग्रेसका प्रमुख सचेतक जमुना ढकालले प्रदेश राजधानी दाङ  सरेपछि  बुटवलका साना  व्यवसायीहरू थप मर्कामा परेको बताएकी छिन्  । उनले प्रदेशको अस्थायी राजधानी बुटवलमा हुँदा साना देखि ठुला सम्म व्यवसायीले आफ्नो व्यवसायबाट सन्तुष्ट रहेको  तर  राजधानी सरेपछि भने यस क्षेत्रका व्यवसायी मर्कामा परेको बत्ताइन् ।

उनले  स साना व्यवसायीहरूलाई  राजधानी सरेको असरबाट जोगाउनको लागि तीन तहका सरकारको बिचमा सहकार्य आवश्यक रहेको समेत बत्ताइन् ।   खुद्रा किराना व्यवसायी सङ्घ रुपन्देहीले नयाँ वर्ष २०८२ को अवसरमा आयोजित शुभकामना आदान प्रदान नथा भित्ते पात्रो विमोचन समारोहमा बोल्दै  सांसद ढकालले  यो क्षेत्रको बजार चलायमान बनाउनको लागि छिमेकी देश भारतका  सीमावर्ती क्षेत्रमा व्यापार गर्न जाने परिपाटीको बन्द  गर्नुपर्ने,  सीमा नाकाबाट विना भन्सार नेपालमा समान ल्याउन प्रतिबन्ध लगाउनुपर्ने र भारतीय पर्यटकलाई नेपाल सहजपुरमा ल्याउनुपर्ने लगायतका काम तत्काल गर्नुपर्ने समेत सुझाइन् । 

उनले भनिन्–‘पर्यटक सहज रूपमा नेपाल आउने वातावरण बनाउने हो भने, त्यसले खाने, बस्ने, खर्च गर्ने नेपालमा नै हुँदा आर्थिक चलायमान हुन महत्त्वपूर्ण भूमिका निर्वाह गर्दछ । कार्यक्रममा बोल्दै उद्योग वाणिज्य सङ्घ बुटवलका अध्यक्ष हरि प्रसाद अर्याल  स्थानीय राजश्व परामर्श समितिको रूपमा आफूले व्यवसायीहरूको समस्याको  विषयमा स्थानीयपालिका मा पटक –पटक सल्लाह र  सुझाव राख्दै  आएको बताए । खुद्रा किराना व्यवसायी को हक हितको लागि  सबैले  हातेमालो गर्दै अगाडि बढ्नुको विकल्प नभएको भन्दै उनले  स्थानीय तहमा दर्ता भएर सञ्चालनमा रहेका व्यवसायीहरूलाई स्थानीय तहले व्यवसायमैत्री वातावरण बनाउनुपर्ने धारणा राखे ।

अध्यक्ष अर्यालले व्यवसायीहरूको समस्या नै सरकारको समस्याको रूपमा लिएर  नेतृत्वमा रहेका व्याक्तिहरुले व्यवसायीहरूको स  साना समस्याको  समाधान गर्नतर्फ ध्यान दिन आवश्यक रहेको बताए । उनले भने–‘करको दायरा बढाउने नाउमा व्यवसायीहरूलाई दुख दिने गरी गरिएको सह्यै हुँदैन, हामी यसमा सहकार्य गर्न तयार छौँ ’

कार्यक्रममा बुटवल उद्योग वाणिज्य सङ्घका सदस्य तथा खुद्रा किराना व्यवसायी सङ्घ  सल्लाहकार कृष्ण प्रसाद पाण्डेले व्यवसायीहरूले हजारौँ, लाखौँ कर तिरेर, भाडा तिरेर व्यवसाय गरेको भए पनि उनीहरूको हितको  लागि स्थानीय तह, प्रदेश र सङ्घले ठोस कुनै पनि काम नगरेको  गुनासो गरेका थिए ।  

कार्यक्रममा खुद्रा किराना व्यवसायी सङ्घ रुपन्देहीका अध्यक्ष महेन्द्र पोखरेलले कार्यक्रमको उद्देश्य बारेमा प्रकाश पार्दै व्यवसायी एकतामा जोड दिएका थिए ।  उनले एकतानै बल भएको भन्दै व्यवासयहरुको बिचमा एकता भएमा मात्रै विभिन्न कार्य गर्न  सकिने भन्दै यसको लागि सबैले आ आफ्नो निकायबाट साथ र सहयोग  गर्नुपर्ने, भूमिका खेल्नुपर्ने बताएका थिए । कार्यक्रममा सङ्घका संस्थापक अध्यक्ष  टिकाराम गैरेले ठेला, डोके, पोके, व्यवसायीको कारण दर्तावाला व्यवसायी मर्कामा परेको बताएका थिए । 

कार्यक्रममा  देउराली उपभोक्ता सहकारी संस्था का अध्यक्ष तथा सङ्घका पूर्व अध्यक्ष ज्ञान प्रसाद न्यौपाने, बुटवल उद्योग व्यापार सङ्घका अध्यक्ष ‎विष्णु पाण्डे,  रुपन्देही व्यापार सङ्घका कोषाध्यक्ष मणि खनाल, खुद्रा किराना व्यवसायी सङ्घका पूर्व अध्यक्ष मोहन बस्याल लगायतले आ आफ्नो भनाई राखेका थिए ।  कार्यक्रमको सञ्चालन  महासचिव दधि  ज्ञवाली गरेका थिए ।संस्थाका सचिव एवं  क्यालेन्डर प्रकाशन समितिका संयोजक यमलाल बेल्बासेले धन्यवाद ज्ञापन  गरे थिए ।