अफगानिस्तानसँग १३० रनले हार्यो नेपाल

काठमाडौं । घरेलु टोली नेपाल यूथ एकदिवसीय अन्तर्राष्ट्रिय क्रिकेट शृङ्खलाको बिहीबार खेलिएको पहिलो खेलमा अफगानिस्तानको यू-१९ टोलीसँग एक सय ३० रनले पराजित भएको छ । जितसँगै अफगानिस्तानले तीन खेलको शृङ्खलामा १-० को अग्रता लिएको छ । 

काठमाडौंको मूलपानी क्रिकेट मैदानमा टस जिती पहिले ब्याटिङको निर्णय लिएको अफगानिस्तानको टोलीले निर्धारित ५० ओभरमा नौ विकेट गुमाएर तीन सय रन बनायो । जवाफी ब्याटिङमा ओर्लिएको नेपालले भने ४६.२ ओभरमा अलआउट हुनुअघि एक सय ७० रनमात्र बनाउन सक्यो ।

अफगानिस्तानको यू-१९ टोलीले नेपालको यू-१९ पुरुष टोलीसँग तीनवटा खेलको शृङ्खला खेल्ने कार्यक्रम छ । नेपालमै आयोजना हुने आईसीसी यू-१९ विश्वकप छनोटको तयारीका क्रममा यो शृङ्खला खेलिएको हो । विश्वकप छनोट खेल पनि मूलपानी क्रिकेट मैदानमै हुनेछ । नेपाल र अफगानिस्तानबिचको शृङ्खलालाई यूथ एककदिवसीय अन्तर्राष्ट्रियको मान्यता दिइएको छ । दोस्रो खेल अप्रिल ६ र तेस्रो खेल अप्रिल ९ तारिखमा हुनेछ ।