२० वर्षे अनुभवलाई आधार मान्दै शंकरनगर वनवाटिकामा पाण्डेले गरे अध्यक्ष उमेद्वारको घोषणा

बुटवल । रुपन्देहीको तिलोत्तमा स्थित शंकरनगर वन विहार तथा अनुसन्धान केन्द्र वनबाटिकाको आगामी नेतृत्वको लागि वर्तमान उपाध्यक्ष खिमलाल पाण्डेले अध्यक्षको उमेद्वारी घोषणा गरेका छन् । पाण्डेले विगत २० वर्षदेखि वनवाटिकाको बिकासमा खटिएको अनुभवका आधारमा नेतृत्व पाउनु पर्ने बलियो आधार भएको दाबी गर्दै अध्यक्ष पदको उम्मेदवारी घोषणा गरेका हुन् । 

आगामी नेतृत्व चयनका लागि हुन लागेको अधिवेशनमा उनले आफूलाई स्वतन्त्र उम्मेदवार घोषणा गरेका हुन् । वनवाटिकामा यसअघिका नेतृत्व सहमतीमा चयन हुँदै आएकोमा यसपटक भने सहमतीको प्रयास सफल नभएपछि निर्वाचन मार्फत नेतृत्व चयन गर्ने कसरत सुरु भएको हो । सोही अनुसार नेपाली काँग्रेस र नेकपा एमालेका तर्फबाट गठबन्धन गरी प्यानलसहित उम्मेदवारी घोषणा भएपछि पाण्डेले आफूलाई स्वतन्त्र उम्मेदवार घोषणा गरेका हुन् । 

कुल १४ वटा पदमा हुने निर्वाचनमा नेपाली कांग्रेस र नेकपा एमाले निकट व्यक्तिहरुले सात सात पद बांडफांट गरेर चुनावी प्रतिष्पर्धामा उत्रिएका छन्। कुल ७ सय ७३ जना सदस्य रहेको वनबाटिकामा यही चैत्र २२ गते अधिवेशन हुँदै छ । पाण्डेले वनवाटिकालाई राष्ट्रियस्तरको उद्यान बनाउने, प्राणी उद्यान (चिडियाघर)लाई नेपालकै नमुना उद्यान बनाउने, अन्तर्राष्ट्रियस्तरको पर्यटकीय गन्तव्यस्थल बनाउने तथा सन्ध्याकालिन उद्यान सञ्चालन गर्ने लगायतका १० बुँदे प्रतिवद्धतासहित उम्मेदवारी घोषणा गरेका छन् । 

‘वनविहारका संस्थापक अध्यक्ष तथा परिकल्पनाकार बाबुराम अर्यालको उद्देश्यलाई साकार पर्ने मेरो लक्ष्य हो ।’–उम्मेदवारी घोषणा गर्दै पाण्डेले भने, ‘कुनै बेला वनवाटिकाको परिकल्पना बारे सुनाउँदा हामीलाई ‘पागल’ भन्नेहरु पनि थिए । आज यो अवस्थामा आउँदासम्म करिब २० वर्ष यस संस्थामा आवद्ध रहेर काम गरेको अनुभवलाई मैले नेतृत्व गरेर प्रयोग गर्न चाहान्छु, त्यसैले मेरो उम्मेदवारी रहेको छ ।’ कार्यसमिति सदस्य, सचिव हुँदै हाल उपाध्यक्ष रहेका पाण्डेले रोलक्रम नुसार र आफ्नो अनुभवका आधारमा अध्यक्ष हुने बलियो आधार तयार भएको उल्लेख गरे । दैनिक ३२ जना कर्मचारीले रोजगारी पाएको शंकरनगर वनविहारमा वार्षिक ४ लाख पर्यटक भित्रिने गरेका छन्।