ताजा अपडेट »

लोकतन्त्रको विकल्प निरंकुशता हुनै सक्दैन् : गृहमन्त्री लेखक

विहीबार, १४ चैत्र २०८१, १३ : २३
48 Shares
विहीबार, १४ चैत्र २०८१
48 Shares

भैरहवा । गृहमन्त्री रमेश लेखकले लोकतन्त्रको विकल्प निरंकुशता हुनै नसक्ने दावी गरेका छन् । उनले मुलुक निरंकुशतातर्फ जान सक्दैन भन्नेमा आफू प्रष्ट रहेको बताएका हुन् । 

नेपाली कांग्रेस क्षेत्रीय कार्यसमिति क्षेत्र नम्बर ३, रुपन्देहीले बिहीबार भैरहवामा आयोजना गरेको भेटघाट तथा अन्तरक्रिया कार्यक्रममा गृहमन्त्री लेखकले समाज पछाडि फर्कन नसक्ने दावी गरे ।

‘एक–दुईचोटी प्रयास गरिएका हुन् । ती प्रयास नेपाली जनताले निस्तेज गरे । किनभने नेपाली जनता लोकतन्त्रमा विश्वास गर्छन्, लोकतन्त्रको मार्गमा अगाडि बढिसकेका छन्, त्यहाँबाट समाज फर्किदैन’उनले भने–‘सरकार परिवर्तन हुने कुरा लोकतन्त्रमा हुन्छ । तर, लोकतान्त्रिक मूल्य र मान्यतामा अभ्यस्त भइसकेको समाज निरंकुशतातर्फ जाला भन्ने मलाई लाग्दैन । 

उनले केही कमीकमजोरीहरु रहेको र जति काम हुनुपर्ने त्यो हुन नसक्दा मानिसमा केही चिन्ता र पीडा रहेको बताए । त्यो चिन्ता र पीडालाई आक्रोशमा बदलेर व्यवस्थाकै विरुद्धमा प्रयोग गर्ने प्रयत्न भइरहेको उनको भनाइ छ। यो व्यवस्थाको पक्षमा उभिन जरुरी रहेको उनले बताए ।  

‘हामीले सुशासन दिनुपर्छ, आर्थिक समृद्धितर्फ अगाडि बढ्नुपर्छ, नागरिकलाई सुविधा दिनुपर्छ, सेवा प्रवाहमा सहजता ल्याउनुपर्छ’उनले भने–‘जनताका पीडा र समस्या छन् । ती पीडा र समस्याको समाधान निरंकुशता होइन लोकतन्त्रमार्फत गर्ने हो ।’  

कांग्रेसका केन्द्रीय सदस्य समेत रहेका नेता लेखकले कांग्रेसको नेतृत्वमा यो संविधान बनेको र संविधान र यो व्यवस्था जोगाउन सबैभन्दा ठूलो दायित्व कांग्रेसको नै भएको दावी गरे ।  

नेपाल विद्युत प्राधिकरणका कार्यकारी निर्देशक कुलमान घिसिङलाई सरकारले हटाएको विषयमा गृहमन्त्री लेखकले यसमा आफूले थप टिप्पणी नगर्ने बताए । सरकारले निर्णय गरिसकेको र आफू यो सरकारको मन्त्री भएकोले यो निर्णय बोक्ने उनले बताए । ‘मन्त्रीपरिषदमा बस्दै गर्दा मन्त्रीका विभिन्न कुराहरु थिए होलान् भन्ने बुझ्नुस्’ उनले भने–त्यो कुरा अब सकिसक्यो ।’ 

कार्यक्रममा नेपाल शिक्षक महासंघ सिद्धार्थनगरका अध्यक्ष चर्तुभुज रेग्मी, कांग्रेस क्षेत्र नम्बर ३ का कोषाध्यक्ष कृष्ण खनाल, क्षेत्रीय प्रतिनिधि गुरचरण प्रजापति, क्षेत्रीय सह–सचिव कुल प्रसाद न्यौपाने, पर्यटन व्यवसायी संजय बजिमय, पूर्व महाधिवेशन प्रतिनिधि भरथरी यादव, युवा नेता टिका जिसी, नारायण प्रसाद कोइराला, सिद्धार्थनगर–४ का सभापति नरेन्द्र प्रसाद रौनियार, जिल्ला सदस्य ओम कुमार श्रेष्ठ, महाधिवेशन प्रतिनिधि विनय ज्ञवाली लगायतले भनाइ राखेका थिए । 

कांग्रेस क्षेत्र नम्बर ३, रुपन्देहीका सभापति सुशील गुरुङको सभापतित्व, उपसभापति सुरेन्द्रजंग थापाको स्वागत तथा क्षेत्रीय सचिव एवं प्रवक्ता लेखनाथ भट्टराईको सञ्चालनमा कार्यक्रम सम्पन्न भएको थियो ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।