रुपन्देहीमा स्थानीय सरकारको टाउको दुःखाई तीन पाङ्ग्रे सवारी साधन

बुटवल । रुपन्देहीको स्थानीय सरकारलाई तीन पाङग्रे सवारी साधन व्यवस्थापन टाउको दुःखाईको विषय बनेको छ । विशेष गरी शहरी क्षेत्रमा तीन पाङ्ग्रेस सवारीको बढ्दो चापले ट्राफिक व्यवस्था अस्तव्यस्त बनेपछि स्थानीय सरकारलाई टाउको दुःखाइएको विषय बनेको हो । 

रुपन्देहीका प्रमुह शहरी क्षेत्रहरु रहेका बुटवल उपमहानगरपालिका, तिलोत्तमा नगरपालिका, सिद्धार्थनगर नगरपालिका, देवदह नगरपालिका तथा सैनामैना नगरपालिकामा समेत तीन पांग्रे सवारीका साधन व्यवस्थापनको चुनौति थपिँदै गएको छ । कार्यविधि निर्माण गरी ई–रिक्सा तथा तीन पाँग्रे सवारीका साधन व्यवसथापनमा केही समय आक्रमक रुपमा लागेको बुटवल उपमहानगर पछिल्लो समय भने सेलाउँदै गएको छ । जसका कारण बजार क्षेत्रमा ट्राफिक व्यवस्थापन प्राय अस्तव्यस्त नै देखिने गरेका छन् । 

यसैबीच सिद्धार्थनगर नगरपालिकाले भैरहवा क्षेत्रमा तीन पाङ्ग्रे सवारीका साधन व्यवस्थापन चुनौतिपूर्ण बन्दै गएको बताएको छ । नगरपालिकाले मँगलबार आयोजना गरेको पत्रकार सम्मेलनमा बोल्दै प्रमुख प्रशासकीय प्रमुख जनक थापा अटो, टेम्पो र ई–रिक्सा जस्ता तीनपांग्रे सवारीको व्यवस्थापन जटिल बन्दै गएको उल्लेख गरे । सिद्धार्थनगर नगरपालिका र नगरपालिका मातहतमा रहेका नगर प्रहरी परिचालन गरेर वा जनप्रतिनिधि कर्मचारी परिचालन गरेर तीनपांग्रे सवारीसाधनको व्यवस्थापन हुन नसक्ने उनले बताए ।

‘नगरपालिकामा तीनपांग्रे सवारी साधनको व्यवस्थापन गर्न नगरपालिकाले धेरै पहलहरु पनि गरेको थियो । तर ई–रिक्सा चालकहरुले नगरपालिकाको निर्णय, पहल, व्यवस्थापनका नियमहरु प्रति आपत्ति जनाउदै धेरै अवरोधहरु गर्दै आइरहेको छ ।’– थापाले भने । 

अटो, टेम्पो र ई–रिक्सा जस्ता तीनपांग्रे सवारीको व्यवस्थापनका लागि जिल्ला प्रशासन कार्यालय, जिल्ला प्रहरी कार्यलय, आवस्यक परेको खण्डमा शसस्त्र प्रहरी कार्यलय र ट्राफिक प्रहरी सहित नगरवासी मिलेर मात्र यस्को व्यवस्थापन गर्न सकिने उनले बताए ।

यसैगरी, तीनपांग्रे सवारीसाधनहरूको व्यवस्थापनका सबै कुराहरुलाई मध्यनजर गर्दै नगरपालिकाले समस्या समाधानका लागि जिल्ला प्रशासन कर्यालय, रुपन्देहीको संयोजनमा कार्यविधि संशोधन गरी दर्ता थप गरी ४७३ वटा ई–रिक्साहरु दर्ता भएको नगरपालिकाले जनाएको छ । सो नियमन तथा अनुगमनलाई प्रभावकारी रुपमा लैजान छिमेकी पालिकाहरुसँगको समन्वयतात्मक बैठकबाट छिमेकी पालिकाहरुले २०८१ माघ २० सम्म कानुन निर्माण गर्ने र २०८१ फागुन २० भित्र दर्ता प्रक्रिया सम्पन्न गरी २०८१ फागुन २१ बाट नगरिभत्र दर्ता नभएका तीनपाङ्ग्रे सवारीसाधनहरु सिद्धार्थनगरभित्र प्रवेश निषेध गर्ने निर्णय भइ कार्यान्वयनको चरणमा प्रवेश गरेकोले थप सरलता भइ तीनपांग्रे सवारीसाधनहरुको नियमन तथा अनुगमन गरिने नगर प्रमुख खाँले बताए ।

यसैगरी जिल्लाको तिलोत्तमा नगरपालिकामा पनि तीन पाङ्ग्रे सवारीको सङ्ख्या बढ्दो छ भने समयमै उचिन नीति निर्माण नगरे सैनामैना तथा देवदहमा पनि भविष्यमा यसको व्यवस्थापन चुनौतिपूर्ण हुने देखिन्छ ।