धनकुटा । काेशी प्रदेशकै लोकप्रिय डिजिटल पत्रिका प्रदेश खबरले स्थापना दिवसको अवसरमा साहित्य विधा तर्फ प्रतिभावान् साहित्यकार झमक घिमिरेलाई प्रदान गरिएको ‘कोशी एक्सिलेन्स अवार्ड २०८१’ उनको घरमै पुगेर प्रदान गरिएको छ ।
फागुन ७ गते इटहरीस्थित सोल्टी वेस्टेन्डमा भएको समारोहमा प्रमुख अतिथिसमेत रहेका कोशी प्रदेशका मुख्यमन्त्री हिकमत कुमार कार्कीले उक्त अवार्ड प्रदान गर्ने कार्यक्रम तय भए पनि साहित्यकार घिमिरे स्वास्थ्य अवस्थाका कारण उपस्थित हुन सकेकी थिइनन् । सो अवार्ड उनको अनुपस्थितिमा शिक्षा सेवी साहित्यकार लेखनाथ घिमिरेले ग्रहण गरेका थिए ।
आइतबार साहित्यकार घिमिरेको घरमै पुगेर उक्त अवार्ड झमक घिमिरे प्रतिष्ठानका अध्यक्ष गोपाल गुरागाईँमार्फत हस्तान्तरण गरिएको प्रदेश खबरका अध्यक्ष पवन अधिकारीले जानकारी गराए । सो कार्यक्रममा पत्रकार महासङ्घ धनकुटाका अध्यक्ष विदुर खवास,नेपाल प्रेस युनियनका कोशी प्रदेश महासचिव सन्जिव वाग्ले, प्रेस युनियन धनकुटाका अध्यक्ष बिनोद घिमिरे लगायतको उपस्थिति रहेको थियो ।
प्रति मस्तिष्क रोगद्वारा पीडित घिमिरेको जन्म २०३७ असार २१ धनकुटाको कचिडेमा भएको थियो । गरिब परिवारमा अशक्तका रूपमा जन्मिएकी घिमिरेको बाल्यकाल कष्टकर बितेको थियो । तर, उनलाई साहित्यले नै उनको सफलताको बाटो कोर्यो । ‘जीवन काँडा कि फूल’ कृतिमार्फत २०६७ सालमा घिमिरेले मदन पुरस्कार समेत पाएकी छन् ।
किशोर उमेरमै साहित्य लेखनमा सक्रिय उनले २०५५ सालमा पहिलो कृति ‘सङ्कल्प’ कविता सङ्ग्रह प्रकाशित गरिन् । त्यससँगै आफ्नै चिता अग्नि शिखातिर २०५७, मान्छे भित्रका योद्धाहरू–२०५७ र नौलो प्रतिबिम्ब–२०६५ कविता सङ्ग्रह प्रकाशित गरिन् ।
उनका एउटा क्वाँटी (विभिन्न विधा) सङ्ग्रह, (अवसान पछिको आगमन–२०५७), एउटा लेख सङ्ग्रह (सम्झनाका बाछिटाहरू–२०५७), एउटा कथा सङ्ग्रह (पर्दा, समय र मान्छेहरू–२०६२) र एउटा निबन्ध सङ्ग्रह (बेमौसमका आस्थाहरू–२०६३) प्रकाशित छन् ।
प्रदेश खबर डटकमको दोस्रो वार्षिकोत्सवको अवसरमा आयोजना गरिएको ‘कोशी एक्सिलेन्स अवार्ड’ १३ विधाका उत्कृष्ट १३ जनालाई अवार्ड प्रदान गरिएको थियो ।
युनिकोड
मिति रूपान्तरण
ग्लोबल आवाज
प्रतिक्रिया