भारत नयाँ दिल्लीबाट आएका साइकिल यात्रीलाई बुटवलमा स्वागत

बुटवल । ‘भारत-नेपाल मित्रता र विश्व शान्तिको लागि राईड’ नारासहित नयाँ दिल्लीबाट यात्रा शुरु गरेका द प्याडलर्स (भारत) का साईक्लिष्टहरुलाई बुटवलमा स्वागत गरिएको छ । बुटवल युनाईटेड साईक्लिङ क्लब, नेपाल खेलकुद पत्रकार मञ्च रुपन्देही, रुपन्देही लन टेनिस संघका पदाधिकारी, सदस्यहरुले विहिबार बुटवलमा १० जना राईडर्सहरुलाई खादा लगाएर स्वागत गरेका हुन । 

कार्यक्रममा क्लबका सचिव राजु तिवारी, मञ्चका अध्यक्ष सुमन अधिकारी, लनटेनिस संघका अध्यक्ष गोपाल ज्ञवालीले स्वागत गरे । भारतको राजधानी नयाँ दिल्लीबाट फागुन ५ गते (फेब्रवरी १७ तारिख) यात्राको शुभारम्भ भई चौथौ दिन बुटवल आईपुगेका हुन । नयाँ दिल्ली गेटबाट पहिलो दिन रुद्रपुरसम्मको २४२ किलोमिटरको यात्रा तय गरेका हुन । यसैगरि दोस्रो दिन रुद्रपुरबाट चिसापानीसम्म २०९ किलोमिटर, तेस्रोदिन चिसापानीबाट लमहीसम्म १९४ किलोमिटर, चौथो दिन लमहीबाट बुटवल १२९ किलोमिटर दुरी पार गरेका छन । ६ दिने यात्रा गरी नेपालको राजधानी काठमाण्डौमा समापन गरिने छ । 

यो समुहको दोस्रो संस्करण भएको संयोजक जसप्रित सिहले बताए । कार्यक्रमको राजदूत डा. पवन धिङ्ग्रा, लिड राइडर सञ्जीव रतन रहेका छन । पाचौ दिन बुटवलबाट चुम्लिम्टार १६६ किलोमिटर र छैटौ दिन चुम्लिम्टारदेखि काठमाण्डौसम्मको १०४ किलोमिटर गरि कुल १०४४ किलोमिटरको यात्रा साईकलबाट गर्नेछन । राईड दुई प्रकारका छन । जसमा एकल, दुई जनाको रिले र चार जनाको रिले रहेका छन । 

द पेडलर एण्ड फिट क्लब (वल्र्ड अल्ट्रा साईक्लिङ एशोसियसन, न्यूयोर्क) आयोजक रहेको कार्यक्रमको ईम्पेक्ट पार्टनर रोटरी डिष्ट्रिक ३२९२, हस्पिटल पार्टनर सिद्धार्थ हस्पिटालिटी, ट्राभल पार्टनर पाथिल होलिडे, प्राविधिक पार्टनर राजेश साईकल्स, साइकोफिट, टेलिकम पार्टनर नेपाल टेलिकम, ईनेर्जी पार्टनर बि कज तथा सपोर्टिङ क्लब बुटवल युनाईटेड साइक्लिङ क्लब रहेको छ ।