संविधान संशोधनका लागि कांग्रेस-एमालेको कार्यदल, सत्तारुढ दलको बैठक बस्दै

काठमाडौं । सत्तारुढ दल नेकपा (एमाले) र नेपाली कांग्रेसले संविधान संशोधनका लागि कार्यदल बनाउने निर्णय गरेका छन्। शुक्रबार बालुवाटारमा बसेको उच्चस्तरीय राजनीतिक संयन्त्रको बैठकले सो निर्णय गरेको हो।

बैठकले संविधान संशोधनका लागि कार्यदल बनाउने र त्यसले देशैभरि अन्तरक्रिया गर्ने निर्णय गरेको गृहमन्त्री एवम् कांग्रेस नेता रमेश लेखकले जानकारी दिए। त्यसको लागि आज (शनिबार) सत्तापक्षीय दलहरूको बैठक बोलाइएको छ। बैठक विहान ११ बजेका लागि बोलाइएको छ । बैठकले सबै दलबीच अन्तरसंवाद गर्ने र सहमतिका साथ अघि बढ्ने बताइएको छ ।

राष्ट्रिय सभाबाट अध्यादेश स्वीकृत गराउन मुस्किल परिरहेका बेला उच्चस्तरीय राजनीतिक संयन्त्रको बैठक बसेको हो। बैठकमा प्रधानमन्त्री एवं एमालेका अध्यक्ष केपी शर्मा ओली र कांग्रेस सभापति शेरबहादुर देउवालगायत नेताहरू सहभागी थिए। साथै कांग्रेसबाट उपसभापति पूर्णबहादुर खड्का र महामन्त्री गगन थापा, एमालेबाट वरिष्ठ उपाध्यक्ष ईश्वर पोखरेल, महासचिव शंकर पोखरेल र उपमहासचिव विष्णु रिमाल उपस्थित थिए।

बैठकमा सरकार सञ्चालनका विषय, संसद्मा प्रभावकारी भूमिकासहित अत्यावश्यक कानुन निर्माणमा तीब्रतालगायत समसामयिक विषयमा छलफल भएको थियो। एकै सातामा संयन्त्रको यो तेस्रो बैठक हो। यसअघि यसै साता दुईपटक संयन्त्रको बैठक सम्पन्न भएको थियो।

सरकारले ल्याएका ६ वटा अध्यादेश संसदका दुवै सदनबाट स्वीकृत गराउनुपर्नेछ। ती अध्यादेश सदनमा पेस भइसकेका छन्। तर, राष्ट्रिय सभामा अध्यादेश पारित गर्न आवश्यक बहुमत जुटाउन सरकारलाई हम्मे परिरहेको छ। सरकारलाई समर्थन गरिरहेका दुई दल जसपा नेपाल र लोसपाले अध्यादेशमा समर्थन नगर्ने भनेका छन्।