सिद्देश्वर मैदानमा माघ २२ देखि लखन कप नकआउट फुटबल प्रतियोगिता

बुटवल । बुटवल उपमहानगरपालिकाको संरक्षकत्व तथा लखन ब्रदर्श यूथ क्लबको आयोजनामा यही माघ २२ गतेदेखि हुने लखन कप नकआउट फुटबल प्रतियोगिता २०८१ को तयारी पूरा भएको छ । बुटवलको सिद्देश्वरी खेल मैदानमा फागुन ७ गतेसम्म सञ्चालन हुने प्रतियोगिताका लागि मैदान मर्मत तथा अन्य तयारीहरु पूरा भएको क्लबका अध्यक्ष सुदिप खत्रीले जानकारी दिए । 

सामाजिक क्षेत्रमा निरन्तर श्रमदान गर्दै आएको क्लबले खेल विकासमा समेत अग्रसरता देखाउनका लागि प्रतियोगिता आयोजना गरिएको बताउँदै अध्यक्ष खत्रीले त्यसको तयारीका लागि डेढ लाख बढी खर्च गरेर मैदान सुधारको काम सम्पन्न भएको जानकारी गराए । क्लबका संरक्षक तथा प्रतियोगिताका संयोजक राम बहादुर थापाले फुटबल खेलको हबका रुपमा रहेको रुपन्देहीमा नयाँ फुटबल प्रतियोगिता आयोजना गर्न लागेको बताए । प्रतियोगिताले नवप्रतिभालाई अवसर प्रदान गर्नुका साथै उनीहरुको आर्थिक तथा खेलकूद बिकासमा टेवा पुग्ने अपेक्षा व्यक्त गरे । 

नअआउट विधिमा सञ्चालन गरिने प्रतियोगितामा रुपन्देही तथा अन्य जिल्लाका समेत गरी १६ टिमले सहभागिता जनाएको संयोजक थापाले जानकारी दिए । प्रतियोगिताको उपाधि विजेता टिमले नगद १ लाख ५१ हजार ५१५ रुपैयाँ, कप, मेडल र प्रमाणपत्र प्राप्त गर्ने छन् भने उप विजेताले नगद ७५ हजार राशीसहित कप, मेडल, प्रमाणपत्र प्राप्त गर्ने छ । यसैगरि विधागत रुपमा सर्वोत्कृष्ट खेलाडीलाई नगद १० हजार ५ सय पुरस्कार प्रदान गरिने आयोजकले जनाएको छ । यसैगरी विधागततर्फ सर्वाधिक गोलकर्ता, उत्कृष्ट गोल रक्षक, उत्कृष्ट डिफेन्डर तथा उत्कृष्ट मिड फिल्डरलाई जनही ५ हजार ५ सय ५५ रुपैयाँ नगद राशी पुरस्कार प्रदान गरिने भएको छ । प्रतियोगिता सम्पन्न गर्न करिब १५ लाख खर्च अनुमान गरिएको क्लबका सचिव निरन्जन पन्तले जानकारी दिए । 

प्रतियोगितामा आयोजक निलो र सेतोसहित सम्पूर्ण युवा क्लब सुपौली, देवदह ब्वाइज युवा क्लब, फर्साटिकर युवाक्लब, चाँदनी युवाक्लब दानापुर, सौभाग्य युवाक्लब, रिभोलुशन क्लब अफ बुटवल, चिया ब्याइज क्लब, द एक्स लिजेण्ड क्लब, सियारी गाउँपालिका, बिगबुद्ध नवयुवा क्लब सुनवल, योङ ब्वाइज खैरेनी, शिवनर परिवार, रामनगर युथ परिवार तथा तिलोत्तमा ११ सहभागी हुने भएका छन् ।