सभापति कप आजदेखि, पहिलो खेलमा चर्च ब्वाइज र संकटा भिड्दै

काठमाडौं । नेपाली कांग्रेस लोकतान्त्रिक खेलकुद संघ महाधिवेशन निर्देशन समितिको आयोजनामा आजदेखि काठमाडौंमा सभापति कप फुटबल प्रतियोगिता सुरु हुँदैछ । दिउँसो ३ बजे हुने उद्घाटन खेलमा ए डिभिजन क्लब चर्च ब्वाइज र संकटा क्लब आमने सामने हुनेछन् । 

खेल अघि औपचारिक उद्घाटन समारोह आयोजना हुनेछ । प्रतियोगिताको उद्घाटन उपप्रधान तथा शहरी विकासमन्त्री प्रकाशमान सिंहले गर्ने आयोजकले जनाएको छ । १७ गतेसम्म चल्ने प्रतियोगितामा ८ टिमको सहभागिता रहेको छ । नकआउट फुटबल प्रतियोगितामा जित्ने टोली सिधै सेमिफाइनल प्रवेश गर्नेछ । प्रतियोगितका लागि सबै टिम तयार रहेको बताएका छन् । बुधबार आयोजित प्रि म्याच कन्फ्रेन्समा सबै टिमका कोच र कप्तानले लामोसमय देखि रंगशालामा प्रतियोगिता नभएको अवस्थामा सभापति कप आयोजना हुनु खेल र खेलाडीका लागि राम्रो अवसर रहेको बताए ।

प्रतियोगिताको उपाधि विजेता टिमले नगद २६ लाख प्राप्त गर्दा उप विजेता टिमले १३ लाख पाउने छ । यसैगरी प्रत्येक खेल खेल्ने दुवै टिमलाई म्याच मनीको रुपमा नगद ५०–५० हजार प्रदान गरिने छ भने प्लेयर अफ दी म्याच बन्ने खेलाडीले १५ हजार पाउने छन् । प्रतियोगिताको टिकट मूल्य भिआइपीतर्फ ३ सय र साधारणतर्फ १ सय रुपैयाँ तोकिएको प्रतियोगिता संयोजक मनिष जोशीले जानकारी दिए । सभापति कपको टिकट खल्ती एपबाट खरिद गर्न सकिने छ ।