‘फेरि रेशम फिलिली’ को पहिलो गीत सार्वजनिक (भिडियाे)

चलचित्र ‘फेरि रेशम फिलिली’ को पहिलो गीत सार्वजनिक भएको छ। माघे संक्रान्तीको अवसरमा चलचित्रमा समावेश ‘ग्रीन कार्डैमा’ बोलको गीत सार्वजनिक गरिएको हो। दीपक शर्माको शब्द रचना र संगीत रहेको गीतमा डेविट शंकरको स्वर रहेको छ। गीतको भिडिओमा मुख्य कलाकार विनय श्रेष्ठ र सुपुष्पा भट्ट लगायत  देखिएका छन् । यो चलचित्र महाशिवरात्रीको अवसर पारेर फागुन १४ गतेबाट प्रदर्शन हुँदैछ।

यसअघि २०७२ सालमा रिलिज भएको चलचित्रमा ‘रेशम फिलिली’ लोकप्रिय गीत ‘पारी त्यो डाँडा’ दर्शकमाझ निकै चर्चित बनेको थियो। सिनेमा आर्ट र वि मोसन पिक्चर्सको सहकार्यमा निर्माण चलचित्रका लेखक र निर्देशक निरोज महर्जन हुन्। रौनक विक्रम कडेल निर्माता रहेको चलचित्रका कार्यकारी निर्माता सुरज विक्रम ठकुरी र सह–निर्मातामा एनि थापा छन्।

चलचित्रमा विनय श्रेष्ठ, सुपुष्पा भट्ट, नीर शाह, कामेश्वर चौरासिया, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको पनि अभिनय छ।

यो चलचित्रमा ‘रेशम फिलिली’का निर्देशक प्रनव जोशी र अभिनेत्री मेनुका प्रधान बाहेकको अधिकांश टिम पुरानै रहेको छ। सुसन प्रजापतीको छायांकन, निर्देशक महर्जन र आकाश बरालको पटकथा रहेको छ। यो चलचित्रलाई गोविन्द शाहीको काफिया चलचित्रस् र कुवेर सिने डिष्ट्रीव्युसनले वितरण गर्दैछन्।