प्रकाश सपुतकाे चलचित्र ‘वसन्त’ काे पाेष्ठर सार्वजनिक, चैत्र २२ गतेबाट रिलिज हुने

काठमाडौं । प्रकाश सपुतकाे  निर्देशन रहेकाे चलचित्र ‘वसन्त’को पोस्टर सार्वजनिक गरीएको छ । चलचित्र प्रदर्शन हुन ठीक २ महिना बाँकी रहँदा पोस्टर सार्वजनिक गर्दै प्काशले चलचित्रकाे प्रवर्धन सुरु भएको जनाएका छन् ।  सपुत स्वयम फिचर्ड पोस्टरमा लक्ष्मीप्रसाद देवकोटा र पारिजातको भित्ते तस्वीर सामुन्ने  बसेर उनको पात्र लेखन कर्ममा ब्यस्त देखिन्छ ।

यो पोस्टरले चरित्र चित्रण र उसको मनोदशालाई दर्शाउन खाेजेकाे छ । चलचित्रमा सपुतको निर्माण, निर्देशनसहित अभिनय, लेखन, गायन र संगीत छ । सपुतले पोस्टर सार्वजनिक गर्दै यो चलचित्र निर्माणको क्रमका हैरानी र दुःखका किस्सा उल्लेख गरेका छन् ।

उनले ‘पूर्णबहादुरको सारंगी’को प्रचारमा समय दिन नपाएको सन्दर्भ कोट्याउँदै लेखेका छन्– सबैभन्दा महत्वपुर्ण योजना विपरित बीचमा एउटा चलचित्रको प्रदर्शनमा मैले समय दिन नपाएपछि केहि शुभेच्छुकहरुको नजरबाट मेरो इमान खोसेको छ । यसबाहेक भोक खोसेको छ ! निद्रा खोसेको छ र म भित्रको एक शान्त मानिस खोसेको छ ! मलाई विश्वास छ ‘बसन्त’मार्फत नै समयले खोसिएका सबै फेरि फिर्ता दिनेछ !’

चलचित्रमा स्वस्तिमा खड्का, खड्गबहादुर पुन, प्रभात पाल, श्री शिभांसी, उर्मिला लाम्गादेको समेत अभिनय रहेकाे छ । गलबन्दी प्रोडक्सनको ब्यानरमा बनेको चलचित्रमा मोहन विश्वकर्मा र विन्दू बोहरा छन् । कार्यकारी निर्मातामा अनुरोध भट्टराई, नाना थकाली र वीरेन्द्रनारायण श्रेष्ठ छन् । यो चलचित्र २२ चैत (अप्रिल ४) मा प्रदर्शन हुने जनाइएको छ ।