बुटवल मेलामा जेष्ठ नागरिकलाई सम्मान

बुटवल । बुटवलको औद्योगिक व्यापार मेलामा जेष्ठ नागरिकलाई सम्मान गरिएको छ । मेलामा मंगलबार जेष्ठ नागरिक मिलन केन्द्र रुपन्देही, तिलोत्तमा-४ श्रीङ्गेश्वर धामका ४१ जना जेष्ठ नागरिकलाई सम्मान गरिएको हो ।

जेष्ठ नागरिक मिलन केन्द्रबाट आएका जेष्ठ नागरिकलाई सम्मान गर्दै मेला आयोजक बुटवल उद्योग वाणिज्य संघका अध्यक्ष तथा कार्यसम्पादन समितिका संयोजक हरिप्रसाद अर्यालले मेलामा जेष्ठ नागरिकलाई सम्मान गर्न पाउँदा आफूहरुलाई पनि सन्तुष्टि मिलेको बताए । उनले सम्मानले जेष्ठ नागरिकमा पनि आत्मसम्मान हुने र प्राप्त भएको आत्मसम्मानले उनीहरुको दीर्घजीवन बनाउन मद्दत गर्ने भएकाले नौलो अभ्यासको थालनी गरिएको बताउँदै आगामी दिनमा यसको दायरा अझै फराकिलो बनाईने भनाई राखे । कार्यक्रममा जेष्ठ नागरिक मिलन केन्द्रका अध्यक्ष यदुनाथ पाण्डेले मिलन केन्द्रमा दिवा सेवा प्रदान गरिएको बताउँदै त्यसमा गराईने योग, ध्यान लगायतका क्रियाकलापले जेष्ठ नागरिकको स्वस्थ्य जीवन र दीर्घायुको लागि सकारात्मक भएको बताए ।

त्यसैगरी जेष्ठ नागरिक ९२ वर्षीय तुलसीराम पौडेल र ८१ वर्षीया मिना थापाले आफूहरु एकै उमेर समुहका मानिसलाई मिलन केन्द्रमा योग, ध्यान तथा आपसमा भलाकुसारी गर्ने अवसर प्राप्त हुँदा एक प्रकारको सन्तुष्टि मिलेको र मेलामा गरिएको सम्मानले आत्मसम्मानका साथै हौसला मिलेको भनाई राखेका थिए । त्यस अवसरमा संघका वरिष्ठ उपाध्यक्ष तथा मेला कार्यसम्पादन समितिका सहसंयोजक टंकप्रसाद गैरे तथा मेलाका प्रवक्ता मुक्तिप्रसाद अधिकारीले भनाई राखेका थिए ।

‘लगानी लुम्बिनीमा : समृद्धि देशमा’ भन्ने मुल नारासहित बुटवल उद्योग वाणिज्य संघ रुपन्देहीको आयोजना तथा बुटवल उपमहानगरपालिका र नेपाल उद्योग वाणिज्य महासंघको संरक्षकत्वमा यहि पुसको ३ देखि सञ्चालित औद्योगिक व्यापार मेला १८ गतेसम्म सञ्चालन हुने छ । मेलामा मँगलबार लोक तथा दोहोरी गायिका रीता थापा, खुमन अधिकारी, घनश्याम रिजाल, अर्जुन खड्का, नवराज पाण्डे, शिव खनाल, वर्षा थापा, मधु परियार, आधुनिक गायक अनिल पहाडी लगायतका कलाकारहरुले प्रस्तुती दिएको सांस्कृतिक कार्यक्रम संयोजक निर्मित कसजूले जानकारी गराए । त

त्यसैगरी डान्स च्याम्प अफ बुटवल र खुला लोक तथा दोहोरी गीत प्रतियोगिता भएको साँस्कृतिक उपसमितिका सहसंयोजक दिपक कार्कीले बताए । बुधबार आधुनिक गायिका देवीका बन्दना, अस्मिता अधिकारी, आधुनिक गायक महेश काफ्ले, लोक तथा दोहोरी गायिका राधिका हमाल, राजु ढकाल, पूर्णकला विसी, श्यामकला भण्डारी, दुर्गा सापकोटा, रितु शाही, बसन्ता खनाल, हास्य कलाकार पुरुषोत्तम भण्डारी लगायतका कलाकारहरुको प्रस्तुती रहने साँस्कृतिक उपसमितिका सहसंयोजक सुमन श्रेष्ठले जमनकारी दिए । त्यसैगरी बुधबार फाईनल हुन बाँकी रहेका प्रतियोगिताहरुको फाईनल हुनेछ ।

मेलामा बुधबार खुल्ला लोक तथा दोहोरी प्रतियोगिता, भ्वाईस अफ बुटवल, डान्स च्याम्प अफ बुटवल र टिकटक प्रतियोगिताको फाईनल हुने प्रचार प्रसार समितिका संयोजक दीपक प्रसाद चापागाईंले जानकारी दिए ।