ममताले जितिन बुटवल मेलामा सम्पन्न व्युटी फेयरको उपाधी

बुटवल । बुटवलमा जारी औद्योगिक व्यापार मेलामा सम्पन्न व्युटी फेयर २०८१ को उपाधि ममता रानाले हात पारेकी छन् । उत्कृष्ट १२ जना मेकप आर्टिस्ट बीच भएको ग्राण्ड फिनालेमा इरुम ब्यूटी पार्लरकी रानाले उपाधिसँगै नगद २० हजार पुरस्कार राशी हात पारेकी छन् । 

यसैगरी फर्स्ट रनरअप बन्न सफल सेजल ब्यूटीहोमकी सेजल प्रधानले नगद १० हजार तथा सेकेण्ड रनरअप बन्न सफल लुमी ब्यूटी होमकी दिपु शाहीले नगद ५ हजार पुरस्कार हात पारिन । प्रतियोगितामा मेकप आर्टिस्टहरु श्रेया केसी, फेसन डिजाइनर अनुपा श्रेष्ठ र सामाजिक अभियन्ता कल्पना शिवाकोटीले जुरी मेम्बरको भूमिका निर्वाह गरेका थिए ।

तिलोत्तमा नगरपालिकाको आर्थिक सहयोगमा आयोजना गरिएको ब्युटी फेयर २०८१ मा निःशुल्क परामर्श, महिला उद्यमीलाई प्रवर्द्धन, हस्तकलाका सामग्रीहरु बिक्री लगायतका स्टलहरु राखिएको महिला उद्यमी तथा ब्युटी फेयर संयोजक रेनु श्रेष्ठले जानकारी दिइन् । बुटवल उद्योग बाणिज्य संघको आयोजनामा यही पौष ३ गतेदेखि अन्तर्राष्ट्रिय प्रदर्शनीस्थल बुटवल मण्डपमा जारी महोत्सवमा काठमाण्डौपछि पहिलो पटक ब्यूटी फेयरको आयोजना गरिएको संयोजक श्रेष्ठले जानकारी दिइन् ।

ब्यूटी फेयरमा सौन्दर्य कलामा लागेका महिलाहरुका उद्यम तथा अन्य महिला उद्यमीहरुलाई समेत जोडेर १६ वटा स्टलमा उनीहरुको उत्पादनहरु राखिएका छन् । मेला घुम्न आउने दर्शकलाई मनोरञ्जनसँगै जीवन जिउने कला र ध्यान बारे समेत जानकारी गराउँदै आइएको ब्युटी फेयरकी संयोजक श्रेष्ठले बताइन् । ब्युटी फेयरको माध्यमबाट थप महिलाहरुलाई उद्यमी बनाउने उद्देश्य रहेको उनले बताइन् । 

यस पेभेलियन अन्तरगत स्किन केयर, हेयर केयर र सौन्दर्यसंग सम्बन्धित विषयमा सेवासंगै विषयविज्ञले परामर्श समेत प्रदान गर्दै आएका छन् । यहाँ छाला, कपाल तथा नङ श्रीङ्गार तथा सजावटमा प्रयोग गरिने राष्ट्रिय तथा बहुराष्ट्रिय कम्पनीका प्रोडक्टहरु विक्रिका लागि राखिएका छन् ।