बेलायती राजदूत रब फेनले जानकी मन्दिरमा मनाए २२ औँ वैवाहिक वर्षगाँठ

काठमाडौँ । नेपालका लागि बेलायती राजदूत रब फेनले आफ्नो २२ औँ वैवाहिक वर्षगाँठ जनकपुरधामको जानकी मन्दिरमा मनाएका छन् । आफ्नो श्रीमती जुलिया फेनसंग धनुषाका विभिन्न क्षेत्र घुम्न आएका फेनले शनिबार आफ्नो वैवाहिक वर्षगाँठ जानकी मन्दिर परिसरमै मनाएका हुन् ।

गत वर्ष काम विशेषले जनकपुरधाम आएको बेला उनले यहाँको संस्कृति र इतिहासले आफू निकै नै प्रभावित भएको भन्दै आफ्नो वर्षगाँठ मिथिलाशैलिमा यहिँ आएर मनाउने सोचेको बताए ।

उनले राम र सिताको प्रेमको चर्चा गर्दै यहाँ आएर फेरि आफ्नो श्रीमतीसँग विवाह गरेको जस्तै अनुभूति भएको बताए । उनले जनकपुरधाम विवाहको लागि उपयुक्त डेस्टिनेसन भएको धारणा राखे । उनले सम्पूर्ण बेलायतवासीलाई एक पटक जनकपुरधाम आउन आग्रह समेत गरे ।

यता जानकी मन्दिरका उत्तराधिकारी महन्थ राम रोशन दास वैष्णवले राजदूत फेनलाई मिथिलाशैलीमा वैवाहिक परमपरा अनुसारका पहिरन लगाइदिनुका साथै मन्त्र पाठ गरी पुनः विवाह गराएका थिए । उनले जानकी मन्दिरको इतिहास स्मरण गर्दै प्रेमको पहिचान रहेको जानकी मन्दिर र जनकपुरधामलाई विवाह डेस्टिनेसनको रूपमा विकास गर्न सरकारसँग आग्रह गरे ।

राजदूत फेनको वैवाहिक वर्षगाँठ कार्यक्रममा प्रदेशका सभामुख रामचन्द्र मण्डल, संस्कृति मन्त्री रानी शर्मा तिवारी, जनकपुरधाम उपमहानगरपालिकाका मेयर मनोज कुमार साह लगायका विशिष्ट व्यक्तिहरूको उपस्थिति रहेको थियो ।