शैक्षिक हब बन्दै बुटवल कालिका क्याम्पस

लुम्बिनी प्रदेशका सामाजिक विकासमन्त्री माननीय जन्मजय तिमिल्सना कार्यक्रम थलोमा आउँदा सबैले ताली बजाएर सम्मान गरे । बुटवल कालिका क्याम्पसको ११ औं वार्षिकोत्सव एवम् अभिभावक दिवसका अवसरमा उनी प्रमुख अतिथि थिए । उनी लगायतका पाहुनाहरुले क्याम्पसद्वारा प्रकाशित नयाँ कदम(मुखपत्र–२) र अनुसन्धानमूलक जर्नलको विमोचन समेत गरेका थिए । 

निर्धारित समयभन्दा कार्यक्रम ढिला सुरु भएको र आफू मोतीपुर औद्योगिक ग्रामको जग्गासम्बन्धी कामका लागि जानेभनेर बुटवल उपमहानगरपालिकाका नगर प्रमुख विशिष्ट अतिथिका रुपमा आफ्ना पवित्र वचन राखेर बिदा भए । उनले बुटवललाई शैक्षिक पर्यटनको हब बनाउने कुरा गरे । प्रमुख अतिथिलाई आफ्नो चुनावक्षेत्रमामात्र शैक्षिक वजेट नराखेर बुटवलमा पनि राख्न विशेष अनुरोध गरे । बुटवलको कालिका क्याम्पसमा देशका सातै प्रदेशका विद्यार्थीले प्रतिनिधित्व गरेको गरिमामय क्याम्पस रहेको बताए । बुटवललाई देशकै नमूना शैक्षिक केन्द्र बनाउन सकेमा जाती हुने भएकोले आफ्नो नगरको २६ प्रतिशत् वजेट शिक्षामा लगानी गरेको गर्वका साथ सुनाए । 

क्याम्पसको भलो चिताउँदै प्रमुख अतिथि सामाजिक विकासमन्त्रीले आफूले आफ्नो क्षेत्रबाट सक्दो सहयोग गर्ने वचनवद्धता जाहेर गरे । कालिका क्याम्पसले आफूलाई नयाँ उर्जा र थप हौशला दिएको बताउँदै आफ्नो प्रदेशको १०÷१२ वटा स्कूल र क्याम्पसको अनुगमन र निरीक्षण गरेपछि सारै हतास भएको सुनाए । प्रदेश सरकारको शिक्षामा गरिएको लगानीअनुरुप सफलता हासिल गर्न नसकेकोले आफू निराश भएको बताएका थिए । एसईईको नतीजा राम्रो नआएकै कारण प्लस टू र क्याम्पसहरु सञ्चालनमा कठिनाई आएको र लुम्बिनी प्राविधिक विश्वविद्यालयलाई राम्रोसँग सञ्चालन गर्न सबैको हातेमालो चाहिने उल्लेख गरे । 

मन्त्री जन्मजयले आफूलाई बुटवल, शैक्षिक हब बन्न सक्छभन्ने कुरा कालिका क्याम्पस प्रशासन र सञ्चालकहरुको विशेष योगदानले प्रमाणित गरेको भाषण गरिरहँदा तालीले उनलाई भव्य सम्मान गरेको थियो । उनले जोशिदै भने–क्याम्पसले अर्को वार्षिकोत्सवमा बोलाएपनि नबोलाएपनि आफू फेरि आउने कुरा दोहो¥याइँ रहँदा झन् जोरजोरले ताली बजिरह्यो । सांस्कृतिक कार्यक्रममा पनि उनको चासो रहेछ । थारु संस्कृति हेरेर उनी मख्खमात्र परेनन् आफू बर्दियाको थारु गाउँमा रहेको र उक्त संस्कृतिप्रति समर्पित रहेको समेत सुनाए । जानेबेला उनै कलाकारसँग फोटो खिच्न समेत तम्से । 

मन्त्रीले सबैलाई भाषण गरेर चकित बनाए । आउनेबेला प्रदेशको निराश शैक्षिक स्थिति सम्झेका उनलाई जानेबेला गजवकै हौशला मिल्यो । क्याम्पसका विद्यार्थीको शैक्षिक प्रदर्शनीले उनमा उमंग छायो । प्रविधिमैत्री प्रदर्शनीले जाँगर थप्यो । क्याम्पसलाई विशेष धन्यवाद् दिदै क्याम्पस सञ्चालक,प्रशासन,विद्यार्थी,अभिभावक र सरोकारवाला सबैलाई उनले कृतज्ञता प्रकट गर्दै लुम्बिनी प्रदेशकै नमूना क्याम्पस बनाउन लाग्ने सबैलाई आभार प्रकट गरे । 

क्याम्पसका सबैजसो विद्यार्थी कार्यक्रममा सहभागी थिए । क्याम्पस सभा सदस्यहरु थिए । सञ्चालक समितिका सबै थिए । क्याम्पसका सबै अध्यापकहरु थिए । गन्यमान्य सबै थिए । पाहुनाहरु सबै थिए । उत्तम नतीजा दिने अध्यापकहरुलाई पुरस्कृत र सम्मान गरिएको थियो । सर्वोकृष्ट नतीजा हासिल गर्ने विद्यार्थीहरुले पुरस्कार थापे । वार्षिकोत्सवमा भएका शारीरिक,बौद्धिक खेलमा सफलता प्राप्त गर्नेहरुले घाँटीमा मेडल र प्रमाणपत्र पाए । कार्यक्रमका बीचबीचमा प्रदर्शित सांस्कृतिक कार्यक्रमले सबैलाई मख्ख पारेकै थियो । विद्यार्थीका कला बेजोड थियो । 

कार्यक्रम व्यवस्थित थियो । विद्यार्थी अनुशासित थिए । कुनैपनि प्रकारका हल्ला थिएनन् । शान्त विद्यार्थी,शालीन अभिभावक,धैर्यवान पाहुनाहरुले कार्यक्रमलाई साथ दिइरहेका थिए । त्यही भएरपनि प्रमुख अतिथिले कालिका क्याम्पसका विद्यार्थीको अनुशासनलाई सलाम गरेका थिए । 

क्याम्पस प्रमुख घनश्याम पाठकले प्रतिवेदन सरर्सती पढेनन् । मुखपत्रमा छापिएकोले पाहुनाहरुलाई पढ्नेगरी मुखपत्र जिम्मा दिए । उनले आफूहरुको साझा प्रयासले नै आजको बुटवल कालिका क्याम्पस रहेको सुनाए । सञ्चालक समितिका अध्यक्ष होमबहादुर गलामीको प्रशंसा र सम्मान गरे । उनलाई क्याम्पस स्थापनाको मियो माने । सबैले सबैलाई विश्वास ठानेर नै आजको कालिका क्याम्पस यहाँसम्म आइपुगेको बयान गरे ।  यो क्याम्पस,सामुदायिक क्याम्पसमात्र नभएर सबैको विश्वास गर्ने शैक्षिक हब बन्दै जानुमा सबैको अतुलनीय योगदान रहेको उनले चर्चा गरे । 

क्याम्पसका पुराना अध्यक्ष अर्जुमान सैजु र अक्षयकोषदाता भूपालकुमार श्रेष्ठ, कार्यक्रममा सम्मानित भए । दोसल्ला ओढाइए । शान्दार सम्मानपत्र हातमा थमाइए । उनीहरु नि मख्ख भए । पत्रकार कपिल ज्ञवाली पनि सम्मानित अवसर  पाए । क्याम्पस सञ्चालक समितिका अध्यक्ष होमबहादुर गलामीले उपस्थित सबैलाई स्वागत गरे । सम्मानभाव प्रकट गरे । कार्यक्रमलाई शोभा बढाई दिएकोमा सबैप्रति अनुगृहित भए । सहायक क्याम्पस प्रमुख महेश ज्ञवालीले कार्यक्रम सञ्चालन गरेका थिए । लामालामा र धेरै वक्ता कार्यक्रममा थिएनन् । यो नै उदाहरणीय काम थियो । 

खाजा सबैलाई व्यवस्था थियो । बसेकै स्थानमा । यसले पनि व्यवस्थापनमा सहयोग पुगेको थियो । सानातिना गल्तीकमजोरी त हुन सक्छन् । तयारी उत्तम हुँदाहुँदै पनि । यसलाई आगामी दिनमा नदोहोराउने गरी अघि बढ्नु नै श्रेयस्कर हुनेछ । कमजोरीलाई कनिकुथी गरी कुम्ल्याएर बस्नु हितकर हुँदैन । कार्यक्रम,तोकिएभन्दा केही समय ढिला सुरु भएकै कारण समापन हुनेबेला नि लम्बियो । बुटवल कालिका क्याम्पसबाट धेरै सिक्नुपर्ने र थोरै त्याग्नुपर्ने कुराहरु होलान् । यो नै सिकाई हो ।