कर्णाली र काठमान्डु भिड्दै : दुबै टोलीको दोस्रो खेलमा पहिलो जितको लक्ष्य

बुटवल । नेपाल प्रिमियर लिग (एनपिएल) अन्तरगत पहिलो खेलमा पराजितका काठमाडौं गुर्खाज र कर्णाली याक्सबीच आज प्रतिस्पर्धा हुँदै छ । आजको पहिलो खेलमा कर्णाली र काठमाडौं खेल्न लागेका हुन् । 

दुईबीचको खेल कीर्तिपुरमा रहेको टियु क्रिकेट मैदानमा बिहान ९ बजेपछि सुरु हुनेछ । दुवै टोली पहिलो खेलमा पराजित भएकाले यस खेलमा पहिलो जित हात पार्न चाहान्छन् । काठमाडौं पहिलो खेलमा चितवन राइनोजसँग ५ विकेटले पराजित भएको थियो । कर्णाली भने जनकपुर बोल्ट्ससँग ८ विकेटले पराजित भएको थियो । काठमाडौं करण केसीको कप्तानीमा रहँदा कर्णाली भने सोमपाल कामीको कप्तानीमा रहेको छ ।

आजै हुने दोस्रो खेलमा लुम्बिनी लायन्स र विराटनगर किंग्सबीच खेल हुँदैछ । टियु क्रिकेट मैदान कीर्तिपुरमा हुने खेल दिउँसो १ बजेबाट सुरु हुनेछ । लिगमा पहिलो खेल खेल्दै गरेको लुम्बिनी जितका साथ प्रतियोगिता सुरुवात गर्न चाहान्छ ।

विराटनगर लगातार दुई हारसँगै लिगको खराब सुरुवात गरेको छ । यस खेलमा जित निकाल्दै लयमा फर्कने लक्ष्यमा विराटनगर रहेको छ । पुस ६ गतेसम्म चल्ने एनपिएलमा ८ टोलीको सहभागिता छ । राउन्ड रोबिन लिगपछि शीर्ष ४ टोली प्लेअफमा प्रवेश गर्नेछन् ।