आईफोन १४ प्रो म्याक्सबाट खिचिएको नेपाली फिल्म ‘अमेजन प्राइम’ मा रिलिज

काठमाडौं । आईफोन १४ प्रो म्याक्सबाट खिचिएको नेपाली फिल्म ‘अ प्लेस अन्डर द सन’ अमेजन प्राइममा रिलिज भएको छ ।  वन स्क्वाड फिल्म्सले हालै मात्र चलचित्र अमेजन प्राइममा रिलिज गरेको हो । सुरुवाती चरणमा यो चलचित्र अमेजन प्राइमको क्यानडा र अमेरिकाको सर्भरमा मात्रै उपलब्ध छ । विस्तारै अन्य क्षेत्रमा उपलब्ध गराइने फिल्मका निर्देशक जेसन लोप्चनले जानकारी दिएका छन । 

“अहिले यो क्यानडा र अमेरिकामा उपलब्ध छ,”  निर्देशक लोप्चनले भने, “हामी अन्य क्षेत्रमा पनि उपलब्ध गराउने प्रयास गरिरहेका छौं ।”  झन्डै डेढ वर्षअघि छाँयाङ्कन सुरु भएको यस फिल्मको प्रिमियर करिब दुई महिनाअघि गरिएको थियो । त्यस क्रममा यस फिल्मले राम्रै चर्चा पाएको थियो ।

फिल्म अमेजनमा सार्वजनिक भएसँगै निर्माता टोलीले ओएसआर डिजिटल मार्फत युट्युबमा ट्रेलर पनि सार्वजनिक गरेको छ ।  निर्देशक लोप्चनले यो फिल्म नेपाली हलमा प्रदर्शनमा ल्याउने तयारी गरिरहेको पनि बताए । “हामीले नेपाली हलमा सार्वजनिक गर्ने प्रयास गरिरहेका छौं,” उनले भने, सफल भए केही समयमै हलमा आउँछ । यदि सम्भव भएन भने हामी नेपाली ओटीटी प्लेटफर्म मार्फत दर्शकमाझ ल्याउनेछौं । फिल्म आईफोन १४ प्रो म्याक्सबाट खिचेको दाबी गरिएको छ ।