युट्युबर मिस्टर बिस्टका कन्टेन्ट अब नेपाली भाषामै हेर्न पाइने, राखे नेपाली अनुवादक

काठमाडौं । सबैभन्दा बढी सब्स्क्राइबर भएका युट्युबर मिस्टर बिस्टका कन्टेन्ट अब नेपालीमै हेर्न पाइने भएको छ । मिस्टर बिस्टको कम्पनी ‘क्रियटर ग्लोबल’ले नेपाली डब आर्टिस्ट र भाषा संयोजक राखेर नेपाली भाषामा भिडिओ देखाउने तयारी गरेको हो ।

‘क्रियटर ग्लोबल’ले चार महिनाअघि सामाजिक सञ्जाल लिङ्क्डइनमा पोस्ट राख्दै नेपाली अनुवादकका लागि आवेदन खुलाएको थियो । त्यसमध्येबाट सारस शर्मा अधिकारी छनोट भएका थिए । अधीकारीले दुई महिनाअघि आवेदन दिएका थिएँ ।  छनोट भएसंगै अहिले उनकाे  काम अनुवाद भएको भाषा ठीक छ छैन जाँच गर्ने र कसरी राम्रो बनाउन सकिन्छ भनेर सुझाव दिनु हो ।  सुरुवाती चरणमा मिस्टर बिस्टकै मुख्य युट्युब च्यानलबाट प्रसारण हुने शर्ट भिडिओमा नेपाली भाषाको विकल्प हुने अधिकारीले बताए । 

अमेजनको भिडिओ स्ट्रिमिङ प्लेटफर्म प्राइम भिडिओमा मिस्टर बिस्टको रियालिटी शो आउने तयारी भइरहेको छ । १० करोड डलर बराबरको उक्त शोमा एक हजार प्रतियोगीबाट एक जना विजेतालाई ५० लाख डलर उपहार दने बताइएको छ । मिस्टर बिस्टले यो नै अहिलेसम्मको सबैभन्दा ठूलो गेम शो हुने दाबी गर्दै आएका छन् । १० देखि १२ ओटा एपिसोड हुने उक्त शोमा विश्वमा बोलिने प्रमुख भाषा डब गरिएको छ । 

त्यसबाहेकका अन्य भाषा भने सबटाइटलका रूपमा उपलब्ध हुने बताइएको छ । सम्भवतः नेपाली सबटाइटल यही भिडिओमा उपलब्ध हुनेछ । नेपाली भाषामा प्राइम भिडिओका कन्टेन्ट डब हुन्छन् वा हुँदैनन् स्पष्ट छैन ।  प्राइम भिडिओमा आउन लागेको शोको औपचारिक घोषणा गर्न मिस्टर बिस्ट १० नोभेम्बरमा छिमेकी देश भारत आउँदैछन् । भारत भ्रमणका क्रममा उनले आफ्नो चकलेट ब्रान्ड फिस्टेबल समेत सार्वजनिक गर्ने बताइएको छ ।