नेपाल एअरलाइन्सकाे पनि भैरहवा–दुबई उडान पुनः सुुरु, साताको चार दिन नियमित उडान भर्ने

भैरहवा। नेपालकाे राष्ट्रिय ध्वजावाहक वायु सेवा नेपाल एअरलाइन्सले पनि  भैरहवा स्थित गौतमबुद्ध अन्तर्राष्ट्रिय विमानस्थलबाट पुनः अन्तर्राष्ट्रिय उडान सुरु गरेको छ । विमानस्थल सञ्चालनपछि मलेसिया उडान सुरू गरेर उडान स्थगित गरेको नेपाल एअरलाइन्सले पुनः शनिवार रातिदेखि काठमाडौं–भैरहवा–दुबई–काठमाडौं उडान सुरु गरेको हो । 

एअरलाइन्सले शनिबार राति ११ बजे काठमाडौंबाट १५८ जना यात्रुसहित उडान भरी भैरहवा स्थित गौतमबुद्ध अन्तर्राष्ट्रिय विमानस्थलमा अवतरण गरेको थियाे । भैरहवा विमानस्थलमा अवतरण गरेपछि उक्त  जहाजलाई पानीको फोहोराले  स्वागत (वाटर स्यालुट) गरिएको थियो । साे  एअरलाइन्स पौने १२ बजे भैरहवाबाट  सिधा दुबई प्रस्थान गरेको गौतमबुद्ध अन्तर्राष्ट्रिय विमानस्थलका निर्देशक तथा प्रवक्ता दीपक बज्राचार्यले बताएका छन् । 

प्रवक्ता बज्राचार्यका अनुसार नेपाल एअरलाइन्सले अब  उक्त रुटमा साताको चार दिन आइतबार, सोमबार, बुधबार र शुक्रवार नियमित उडान भर्ने छ । एअरलाइन्सले  राति ९ः३० बजे काठमाण्डौंबाट उडान भरेर गौतमबुद्ध अन्तर्राष्ट्रिय विमानस्थलमा अवतरण  गर्ने छ भने करिब आधा घण्टापछि  भैरहवाका यात्रु राखेर  गौतमबुद्ध अन्तर्राष्ट्रिय विमानस्थलबाट सिधा दुबई प्रस्थान गर्ने तालिका छ ।

यो सँगै भैरहवा विमानस्थलबाट नेपाल एअरलाइन्स, जजिरा एयरवेज, फ्लाई दुबई र थाइ एयर एसिया गरी चारवटा वायु सेवाले व्यवसायिक उडान सुरु गरेका छन् । जसमध्ये थाइ एयर एशियाले शुक्रबारदेखि र अन्य तीनवटा एअरलाइन्सले शनिबारदेखि नियमित व्यवसायिक उडान सुरु गरेका हुन् ।