अब सवारी चालकले नागरीक एपकाे भर्चुअल लाइसेन्स देखाए पुग्ने, जाँच गर्ने डिभाइस ट्राफिक प्रहरीलाई प्राप्त

काठमाडौं । नागरिक एपमा भएको सवारी चालक अनुमतिपत्र (ड्राइभिङ लाइसेन्स)को क्यूआर कोड स्क्यान गर्ने स्मार्टफोन ट्राफिक प्रहरीलाई हस्तान्तरण गरिएको छ । शुक्रबार भौतिक पूर्वाधार तथा यातायात मन्त्रालयमा आयोजित कार्यक्रममा ट्राफिक प्रहरीलाई उक्त फोन हस्तान्तरण गरिएको हो । यो व्यवस्था लागू भएसँगै सवारी चालकले नागरिक एपमा रहेको भर्चुअल लाइसेन्स देखाए पुग्ने भएकाे छ ।

अहीले ट्राफिक प्रहरीलाई १०४ थान डिभाइस उपलब्ध गराइएको छ । नेपाल प्रहरीका प्रमुख आईजीपी वसन्त कुँवरले देशभर कूल तीन हजार डिभाइस आवश्यक पर्ने बताए । “पूर्ण रूपमा भर्चुअल माध्यमबाट लाइसेन्सको नियमन गर्न ट्राफिक प्रहरीलाई कूल तीन हजार स्मार्टफोनको आवश्यकता छ भने तत्कालको लागि एक हजार फोन चाहिन्छ,” कुँवरले भने । 

यस डिभाइसको सहायताले ड्युटीमा खटिएका ट्राफिक प्रहरीले चालकको नागरिक एपमा भएको ड्राइभिङ लाइसेन्सको क्यूआर कोड स्क्यान गरी विवरण हेर्न सक्छन् । कारबाही गर्नुपर्ने अवस्थामा त्यही डिभाइसबाट कारबाहीको अनुरोध गर्न सकिने बताइएको छ । उक्त अनुराेध  मेसेज चालकको मोबाइलमा पुग्छ ।

त्यस्तै एक पटक चिट काटिएको छ र त्यसको फाइन चालकले तिरेको छैन भने फेरि स्क्यान गर्नका लागि एपमा क्यूआर कोड देखिने छैन । कार्ड देखिने बनाउन जरिवाना तिर्नुपर्ने हुन्छ । यसरी स्क्यान गरिएको लाइसेन्सको विवरण प्रहरीको ‘टीभीआरएस’ (TVRS) प्रणालीमा अद्यावधिक हुने बताइएको छ ।

अब ट्राफिक प्रहरीले यसको ओरियन्टसेन ट्रेनिङ कार्यक्रम गरेर यथाशीघ्र सेवा सञ्चालनमा ल्याउने  छ भने  डिजिटल सवारी चालक अनुमतिपत्रको व्यवस्थापन थप प्रभावकारी बन्ने विश्वास गरिएको छ ।

स्मार्टफोन हस्तान्तरण कार्यक्रममा भौतिक पूर्वाधार तथा यातायातमन्त्री देवेन्द्र दाहाल, नेपाल प्रहरीका एआईजीद्वय किरण बज्राचार्य र रामदत्त जोशी, डीआईजीद्वय दानबहादुर कार्की र भरतबहादुर बोहोरा, प्रधानमन्त्रीका आईटीविज्ञ अस्गर अली लगायतको उपस्थिति थियो ।

हालै मात्र नागरिक एपमा सवारी चालक अनुमतिपत्रको क्यूआर कोड देखिने सुविधा ल्याइएको छ ।