आजदेखि रास्वपाको राष्ट्रिय भेला

काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय भेला आजदेखि सुरु हुँदै छ । केन्द्रीय परिषद्को पहिलो राष्ट्रिय भेला मंगलबारबाट सुरू हुँदैछ।

काठमाडौं कमलादीस्थित प्रज्ञा प्रतिष्ठानमा दुई दिनसम्म चल्ने केन्द्रीय परिषदको राष्ट्रिय भेलाको उद्घाटन बिहान ११ बजे हुने बताइएको छ । भेलामा करिब १५ सय प्रतिनिधि सहभागी हुने कार्यवाहक महामन्त्री कविन्द्र बुर्लाकोटीले जानकारी दिए।

भेलामा विधान संशोधन प्रस्ताव, राजनीतिक प्रतिवेदन, पार्टीका निकायका प्रतिवेदनलगायत दस्तावेज पेश हुनेछ।पार्टीको गत साउन १८ र १९ गते काठमाडौंमा भएको बन्द कार्यशालाले असोजमा राष्ट्रिय भेला र वैशाख तेस्रो साता पहिलो महाधिवेशन गर्ने निष्कर्ष निकालेको थियो। त्यहीअनुसार नै पार्टीको केन्द्रीय समितिले राष्ट्रिय भेलाको मिति तय गरेको हो। यही भेलाले पार्टीको पहिलो महाधिवेशनको मिति तय गर्नेछ।