लुम्बिनीमा पोखरेल हाबी हुँदा मुख्यमन्त्री बन्न तयार गिरीको नाममा लाग्यो ‘टिपेक्स’

बुटवल । नेकपा एमाले भित्रको शक्ति संघर्ष र गुट राजनीति लुम्बिनी प्रदेशबाट सतहमा देखिएको छ । पार्टी उपाध्यक्ष विष्णु पौडेल र महासचिव शंकर पोखरेल बीच विगतदेखि नै हुँदै आएको शक्ति संघर्षका बारेमा बेला बेला चर्चा हुने गरेको छ । 

यसै बीच लुम्बिनी प्रदेशको मुख्यमन्त्री बनाउने विषयमा एकाएक फेरिएको निर्णयले एमाले भित्र गुट राजनीति भएको आरोपलाई थप जोड पुगेको छ । लुम्बिनीमा संसदीय दलका नेता लिला गिरीलाई छाडेर उप नेता चेतनारायण आचार्यलाई मुख्यमन्त्री बनाउने केन्द्रको ठाडो निर्देशनपछि महासचिव पोखरेल हाबी भएको प्रष्ट हुने स्वयम् एमाले नेताहरुले बताउने गरेका छन् । 

एमालेका एक सांसदका अनुसार दलका नेता गिरीको नाम उपाध्यक्ष पौडेलसँग जोडिएकै कारण उनी मुख्यमन्त्री हुन पाएनन् । एमाले भित्र उपाध्यक्ष र महासचिव बीचको संघर्ष लुम्बिनीमा प्रदेश राजधानी तोक्ने विषय, एमाले लुम्बिनीको अधिवेशन होस वा रुपन्देही जिल्ला अधिवेशनमा समेत कार्यकर्ताले बुझ्नेगरी देखिएको थियो । 

पार्टी भित्रको निर्णयमा उपाध्यक्षमाथि हाबी हुँदै आएका पोखरेलले यस पटक लुम्बिनीमा बन्ने सरकारमा समेत देखाएका छन् । राष्ट्रिय राजनीतिका सत्ता समीकरण परिवर्तनसँगै लुम्बिनीमा एमाले र काँग्रेस मिलेर सरकार बनाउने सहमती अनुसार यहाँ नेत्व पहिले एमालेले गर्ने सहमती बनेको थियो । उक्त सहमती अनुसार दलका नेता लिला गिरी लुम्बिनीको मुख्यमन्त्री बन्ने पक्कापक्की भएको अवस्थामा अप्रत्यासित रुपमा निर्णय परिवर्तन भएको हो । गिरीलाई छाडेर उपनेता आचार्यलाई मुख्यमन्त्री बनाउने पार्टी केन्द्रको निर्देशनपछि गिरी पछि हट्नु परेको छ । एमालेबाट मुख्यमन्त्री बन्दै गरेका आचार्य पार्टी महासचिव पोखरेल निकटका मानिन्छन् भने गिरी उपाध्यक्ष पौडेल निकटका मानिन्छन् ।

यसरी लाग्यो गिरीको नाममा ‘टिपेक्स’ 

लीला गिरीलाई एमालेको तर्फबाट मुख्यमन्त्री बनाउने पत्र तयार हुँदै गर्दा केन्द्रको निर्देशनमा उनको नाममा टिपेक्स लगाएर चेतनारायण आचार्यको नाम लेखिएको पाइएको छ । लीला गिरीको नाममा दावी पेश गर्न जाने गरी एमाले प्रमुख सचेतक तुलसीप्रसाद चौधरीले पत्र तयार गरिसकेका थियो । तर त्यहीबेला पार्टी महासचिव शंकर पोखरेको फोन आएपछि गिरीको नाममा टिपेक्स लगाएर चेतनारायण आचार्यको नाम लेखिएको एमाले लुम्बिनी प्रदेश अध्यक्ष राधाकृष्ण कंडेलले बताए ।

एकाएक यस्तो निर्देशन आएपछि गिरी आफैले पार्टी अध्यक्ष केपी शर्मा ओलीलाई फोन गरेका थिए । त्यसक्रममा ओलीले ‘यसपाली यस्तै भयो’ भनेको गिरीले बताए । सोमबार बिहानसम्म लिला गिरी मुख्यमन्त्री बन्ने पक्कापक्की जस्तै थियो । तर एकाएक यस्तो निर्देशन आएपछि गिरी असन्तुष्ट भएका छन् । उनले राजनीति यस्तै हो भनी प्रतिक्रिया दिए । “यो विधि सम्मत भएन, संसदस्य मूल्य अनुरुप पनि भएन, मैले माथि भनिसकेको छु”–उनले भने ।

नेपाली कांग्रेसका प्रदेश संसदीय दलका नेता तथा पूर्वमुख्यमन्त्री डिल्लीबहादुर चौधरीले पनि दलका तर्फबाट लिला गिरीलाई मुख्यमन्त्री बनाउने भन्ने सहमति पत्र आफूले आइतबार नै दिइसकेको बताए।