बुटवलका घरवेटी : प्रशासनको मान्ने कि, उपमहानगरको ?

बुटवल । हिन्दुहरुको दोस्रो ठूलो चाड तिहारको झिलिमिलीसँगै देउसी भैलो खेल्ने परम्परा रहेको छ । देउसी भैलोलाई व्यवस्थित बनाउन भन्दै जिल्ला प्रशासन कार्यालय रुपन्देहीले ५०१ रुपैयाँभन्दा बढी दक्षिणा नदिन आग्रह गरेको छ । यसैगरी बुटवल उपमहानगरले पनि देउसी भैलो खेल्न आउनेलाई १ हजार १ सय रुपैयाभन्दा बढी नदिन आग्रह गरेको छ ।

स्थानीय सरकारको सूचना र आग्रहलाई सही मान्ने कि, जिल्ला प्रशासन कार्यलयको सूचना र आग्रहलाई सही मान्ने बुटवलका घरवेटी भने अन्यौलमा छन् । "पालना नभए पनि तिहारको समयमा देउसी भैलो खेल्न आउनेलाई दक्षिणा दिने दर/रेट विगतका वर्षहरुमा पनि तोक्ने गरिन्थ्यो ।"-बुटवलका एक घरवेटीले भने,  तर यसरी अलमल पार्ने खालको दुई वटा दर/रेट सुन्दा कसको पत्याउने अलमल परियो ।"

जिल्ला प्रशासन कार्यालयले तोकिएको भन्दा धेरै दक्षिणा दिएमा, जुवातास खेलेमा, पटका बेचबिखन र पड्काउने काम गरेमा कानुनअनुसार कारबाही गर्ने चेतावनीसहित सूचना जारी गरेको छ । बुटवल उपमहानगरले पनि चाडपर्वलाई सभ्य र मौलिक मनाउन भन्दै दक्षिणाको दर/रेट तोकेको छ । यसरी दुई सरकारी कार्यालयबाट एउटै प्रयोजनका लागि जारी भएका दुई फरक-फरक मापदण्डले कार्यान्वयन गर्न चाहनेहरुलाई समेत दोधारमा पारेको छ ।