भैरहवामा सम्पन्न ‘माया रोटरी हाफ म्याराथन’को उपाधि अनिशलाई

बुटवल । रुपन्देहीको भैरहवामा शनिबार आयोजित ‘माया रोटरी हाफ म्याराथन-२०२३’ को उपाधि अनिश थापाले हात पारेका छन् । भारतीय सेनामा कार्यरत पर्वतका ३३ वर्षीय थापाले निर्धारित २१ दशमलव १ किलोमिटर दुरी १ घण्टा ६ मिनेट ४३ सेकेन्डमा पूरा गरेका हुन् ।

‘आजै पोलियो उन्मुलन गरौं’ भन्ने मुल नारासाथ आयोजित हाफ म्याराथनमा नेपाली सेनामा कार्यरत बैतडीका २८ वर्षीय नरेन्द्रसिंह राना दोस्रो भए । उनले निर्धारित दुरी १ घण्टा ७ मिनेट ४ सेकेन्डमा पार गरेका थिए । नेपाली सेनामा कार्यरत महेन्द्रनगरका मुकेशबहादुर पालले १ घण्टा ८ मिनेट ४२ सेकेन्डमा निर्धारित दुरी पार गरेर तेस्रो स्थान हासिल गरे ।

भैरहवाको बुद्वचोकबाट बिहान सुरु म्याराथनमा दुई सय धावक सहभागी थिए । म्याराथनमा नेपाली सेना, सशस्त्र प्रहरी, नेपाल प्रहरीका साथै विभिन्न क्लव र व्यक्तिगत धावक सहभागी भएका थिए । बुद्वचोकबाट सुरु दौड देवकोटा चोक, बसन्तपुर, बेलहिया बाइपास, पर्यटकीय द्वार हुँदै पुनः देवकोटा चोक, गौतमबुद्व विमानस्थल भएर लुम्बिनी गेट हुँदै आवारोडस्थित सानु डिपार्टमेन्टल चोकमा आएर समापन भएको थियो ।

म्याराथनमा प्रथम भएका थापालाई १ लाख, दोस्रो हुने रानालाई ७५ हजार, तेस्रो भएका पालालाई ५० हजार रुपैयाँ नगद पुरस्कार, मेडल, प्रमाणपत्र प्रदान गरिएको थियो । साथै दुईरदुई जना महिला र पुरुषलाई सान्त्वना पुरस्कार स्वरुप ५र५ हजार रुपैयाँ प्रदान गरिएको थियो ।

पोलियो उन्मुलनको सन्देश दिन रोटरी क्लव अफ लुम्बिनी सिद्वार्थनगर, रोटरी क्लव अफ सेन्ट्रल लुम्बिनी र रोटरी क्लव भैरहवाले म्याराथन आयोजना गरेका हुन् । रोटरी क्लव अफ सेन्ट्रल बुटवल र रोटरी क्लव अफ राजधानी सह आयोजक रहेको रोटरी डिष्ट्रिक पब्लिक इमेज चेयर तथा म्याराथन संयोजक राजकुमार गुप्ताले बताए । प्रत्येक वर्ष पोलियो दिवसका दिन आयोजना हुँदै आएको म्याराथन कोरोना महामारीका कारण यसअघि स्थगित रहेको थियो ।