ईजरायलमा रहेका नेपालीको भोगाई : ‘उनीहरुमा जस्तो मानवता अन्त छैन’

गुल्मी । बुधबार बिहान गुल्मी अमरपुरकी कमला पराजुली युद्धग्रस्थ देश इजराइलबाट सम्पर्कमा आइन् । यसरी परिवार र हाम्रो सम्पर्कमा आउने उनी गुल्मीकी ८ औं व्यक्ति थिइन् । भनिन् ‘इजरायलीहरुमा जस्तो मानवता अन्त कतै छैन । म इजरायलमा सन २००६ देखि आएकी हु । १७ वर्षको अनुभवमा यहाँका मानिसहरु जस्तो मिलनसार र मानवता अन्त कतै छैन भन्ने लाग्छ ।’ उनले अघि भनिन्, ‘यहाँ हामी सुरक्षित छौं, पीर–चिन्ता नगर्न भन्नू होला । बोर्डरसाईडमा मात्रै हो । त्यतातिर नेपाली धेरै छैनन्, जस्तो लाग्छ । राजधानी तेलाअभिभ भन्दा पनि अझ टाढा छौं । यहाँ २० वर्ष अघि पनि यस्तै भीषण युद्ध हुँदा राजधानी नजिकैसम्म आएका हुन रे हमासहरु । अहिले त बोर्डर साईडतिरै हो आक्रमण भएको ।’

उनीसँग नियमित सम्पर्कमा रहेकी मालिका गाउँपालिकाकी रेनु अधिकारी थापा पनि सुरक्षित रहेको जानकारी दिइन् । रेनुसँगै इजरायलमा रहेर सम्पर्कमा आउने गुल्मेलीको सङ्ख्या ११ जना पुगेको छ । रेनुले आफ्नो खबर सुनाउन हामीलाई फोन गर्दा इजरायलमा बुधबार बिहानको ८ बजेर ३९ मिनेट समय भएको थियो । नाम खुल्न बाँकी रिडीकी एक महिला र चन्द्रकोट गाउँपालिका–२ की लक्ष्मी गौतम विगत १५ वर्षदेखि इजरायलमै रहेकी छन् । गौमले नेपालमा विद्यार्थी पठाउन सहजीकरण समेत गरिन् ।
इजराइलमा रहेकी कमला पराजुलीले भनिन् ‘हामीलाई दुःखको बेला साथ दिने यी प्यारा इजरायलिको यो विपदमा छाडेर हामी स्वदेश फर्किन चाहन्नौं । हाम्रा नेपाली भाईहरु इजरायलीसँग हतियार बोकेर लड्न तयार छौं भन्ने सुनेकी छु ।’ त्यहाँका नागरिक मात्रै होईन सरकार र सुरक्षा निकाय पनि विदेशी नागरिकप्रति निकै ख्याल राख्ने गरेको उनले सुनाइन् ।

त्यहाँका नागरिक १६ वर्ष पुगेपछि अनिवार्य शैन्य तालिम गर्छन । ‘फौजी ड्रेसमा एउटा हातमा हतियार र अर्को हातमा बाईबाई सहित ती इजरायलका भाइ बहिनीहरुको त्यो मुस्कान अहिले झलझली आँखामा घुमेको छ र उनीहरुलाई काँडाले नकोतरोस भन्ने मनोकामना जागृत भएको छ ।’–पराजुलीले भनिन् ।

पराजुलीका अनुसार त्यहाँका बालकदेखि बृद्धसम्म निडरताका साथ लडाइँको मैदानमा छन् । यहाँसम्म कि ससाना बालबच्चका आमासमेत एउटा हातमा हतियार अर्को हातमा बच्चा लिएर लडाईको मैदानमा छन् । स्वदेशमा दुश्मन लागेपछि विश्वभर छरिएका ईजरायलीहरु समेत धमाधम घर फर्किएर लडाईमा जोडिएका छन् । विश्वको सबै भन्दा अग्लो भूमि सगरमाथाको देश नेपाल र नेपाली अनि विश्वको सबै भन्दा तलको भूमि (रेड सि लाल सागर) इजरायल र इजराईली बीचको सम्बन्ध यसरी निकट छ । हामी कामना गरौं त्यहाँ नागरिकले विजयको झण्डा फहराउन छिट्टै पाउने छन् ।