अहिलेको व्यवस्थाले जनतालाई गाँस, बास कपास दिदैनः पूर्व प्रधानमन्त्री खनाल

भैरहवा । नेकपा एकीकृत समाजवादीका सम्मानित नेता तथा पूर्वप्रधानमन्त्री झलनाथ खनालले अहिलेको व्यवस्थाले जनताको गाँस, बास कपास दिन नसक्ने बताएका छन् ।

समाजवादी जागरण अभियानका क्रममा भैरहवा आएका खनाल आइतबार समाजवादी प्रेस संगठन नेपाल, रुपन्देहीले आयोजना गरेको पत्रकार सम्मेलनमा बोल्दै पहिलाको अर्धसामान्ती व्यवस्था र अहिलेको पूँजिवादी व्यवस्था शोषण मूलक व्यवस्था रहेको बताए । “यी दुवै भ्रष्टाचारसंग अभिन्न रुपले गाँसिएका व्यवस्थाहरु हुन्, ” उनले भने “तर यो पूंजिवादी ब्यवस्था हो भनेर हामी आफैले लडेर २०६२÷०६३ मा ल्याएका हौ ।”

उनले अहिलेको व्यवस्थाले जनतालाई खुकुलो पारे पनि जनतालाई गाँस, बास कपास नदिने उनले जिकिर गरे । उनले युवाशक्तिहरु खाडीलगायतका मुलुकमा पलायन हुनु मुलुकका लागि पनि यो व्यवस्था कारक रहेको बताए । “युवालाई मुलुकमै टिकाउन जरुरी छ, यसका लागि रोजगारी बृद्धि, औद्योगिकीकरण, कृषि क्षेत्रमा व्यापक सुधार र विकास जरुरी छ”, उनले भने ।

मुलुकमा रोजगारी बृद्धि, सुशासन, शिक्षा, स्वास्थ्य, कृषिलाई प्राथमिकीकरण लगायतलाई केन्द्रमा राखेर पार्टीले समाजवादी जागरण अभियान चलाइरहेको बताउँदै उनले यसले समाजवादतर्फ जान मद्दत गर्ने जनाए ।

यस्तै, नेता खनालले नेपालमा नयाँ ढङ्गको धु्रविकरणको आवश्यकता रहेको समेत औल्याए । र्वतमान पुँजीवादी शासन व्यवस्थाका कारण मुलुकले कोल्टे फेर्न नसकेको उल्लेख गर्दै उनले समाजवादी व्यवस्थासहितको नयाँ धु्रबिकरण आवश्यकता रहेकोमा जोड दिए । “समाजवादमा जानका लागि आवश्यक परे विचार मिल्ने कम्युनिस्टहरु एक हुनुपर्ने हुन्छ”, उनले भने “यसका लागि नयाँ धु्रविकरण जरुरी छ ।”

नेता खनालले अहिलेका तीन तहका सरकारले जनताको काम गर्न नसकेको बताए । “यो व्यवस्थामा कुनै सरकारले काम गर्न सक्दैन”, उनले भने “यसैले व्यापक सुदृढिकरण जरुरी छ । यसैले हामीले नयाँ योजनासाथ अभियान चलाएका छौं ।”

समाजवादी पार्टीका उपमहासचिव एवं प्रचार बिभाग प्रमुख जगन्नाथ खतिवडाले जनताका प्रत्यक्ष भोगाईलाई लिएर मेची महाकाली यात्रामा निस्किएको बताए । उनले असोज १४ बाट शुरु भएको यात्रा भैरहवासम्म आउँदा झण्डै ५ हजार बढी स्वतन्त्र नागरिक र विभिन्न पार्टी छाडेर समाजवादी प्रवेश गरेको दावी गरे । यात्राका क्रममा आफूहरुले जनतालाई आश्वस्त पार्ने गरी रोजगारी सिर्जना, कृषिमा आधुनिकिकरण, व्यवसायिकरण लगायतका विषयमा आवाज बुलन्द गरेको र यी पूरा गर्न सरकारलाई दवाव दिने बताए ।

नेता खतिवडाले समृद्धिका लागि रोजगारी र रोजगारीका लागि कृषि संगसंगै लैजानु पर्नेमा जोड दिए । समाजवादी जागरणको मेची–महाकाली यात्रा असोज २९ मा महेन्द्रनगर पुगेर समापन हुनेछ ।