एसिया कपबाट फर्किएको क्रिकेट टीमलाई विमानस्थलमा बाजागाजासहित भव्य स्वागत

काठमाडौँ । एसिया कप क्रिकेट खेलेर नेपाल फर्केको राष्ट्रिय टोलीको भव्य स्वागत भएको छ।श्रीलंका र पाकिस्तानमा जारी एसिया कप क्रिकेटमा नेपाल समूह चरणबाट घर फर्केको हो ।

नेपाली टोलीलाई स्वागत गर्न सशस्त्र प्रहरीको ब्याण्ड टोलीसमेत विमानस्थलमा लगिएको थियो। ब्याण्ड टोलीले मंगलधुन बजाएर टोलीको स्वागत गरेको हो। खेलाडीहरुकाे स्वागत गर्न पुगेका समर्थकहरुले  विमानस्थलमा समर्थन गर्दै नाराबाजी समेत लगाएका थिए । टोलीले पाकिस्तान र श्रीलंकामा दुई खेल खेलेको थियो । पाकिस्तानमा भएको पहिलो खेलमा नेपाली टोली गत बिहीबार पाकिस्तानसँग २३८ रनले पराजित भएको थियो ।

त्यसलगतै भारतसँग खेल खेल्न श्रीलंका पुगेको टोली १० विकेटले पराजित भएको थियो। भारतसँगको खेलमा पानीले खेल बिथोलेको थियो। भारतसँग पराजित भएपछि नेपाल एसियाकपबाट बाहिरिएको थियो। तर पनि समूह चरणमा भारत र पाकिस्तानविरुद्ध निडर र साहसिक प्रदर्शन गरेको भन्दै क्रिकेट समर्थकहरु टोलीलाई स्वागत गर्न विमानस्थल पुगेका थिए ।

नेपाल बाहिरिएपछि टोली आज स्वदेश फर्किएको हो। भारतसँग म्याच हारेपनि उत्कृष्ट व्याटिङ गरेको नेपाली टोलीको प्रंशसा भइरहेको छ ।