चिनियाँ नक्साले छिमेकी असन्तुष्ट

हङकङ । चीनले हालै सार्वजनिक गरेको नक्साबाट उसका छिमेकीहरू असन्तुष्ट भएका छन् । चीनको प्राकृतिक संशाधन मन्त्रालयले प्रकाशन गरेको मानक नक्साको नयाँ संस्करणले उनीहरू असन्तुष्ट बनेका हुन् ।

नयाँ नक्साबाट दक्षिणपूर्वी एसियाली राष्ट्रहरूको संगठन (आसियान)का पाँच सदस्य मलेसिया, फिलिपिन्स, इन्डोनेसिया, भियतनाम र ब्रनाईले असन्तुष्टि जनाएका छन् । यी देश दक्षिण चीन सागरमा चीनको अत्यधिक क्षेत्रीय दाबीलाई लिएर विवादमा छन् ।

नक्सासम्बन्धी समस्या हुन नदिन नयाँ नक्सा जारी गरिएको बेइजिङले स्पष्ट पारेको छ । तर, पाँचै देशले सार्वजनिक वक्तव्य जारी गरेर चीनको आलोचना गरेका छन् । इन्डोनेसियाको राजधानी जकार्तामा जारी आसियान शिखर बैठकमा पनि चीनको आलोचना गरिएको छ ।

गएको साता दक्षिण अफ्रिकाको जोहानेसबर्गमा भएको ब्राजिल, रुस, भारत, चीन र दक्षिण अफ्रिका सम्मिलित ब्रिक्स शिखर सम्मेलनमा चीनका राष्ट्रपति सी चिनफिङले ‘आधिपत्यवाद चीनको डीएनएमा छैन’ भने पनि नयाँ नक्साबाट उक्त भनाइको खण्डन भएको आसियान नेताहरूले बताएका छन् ।

“फिलिपिन्सले चीनको मानक नक्साको २०२३ संस्करणलाई अस्वीकार गर्छ । फिलिपिन्सका विशेषता र सामुद्रिक क्षेत्रमा चीनको कथित सार्वभौमसत्ता र क्षेत्राधिकारलाई वैधानिक बनाउने यो पछिल्लो प्रयासको अन्तर्राष्ट्रिय कानुन, विशेष गरी सन् १९८२ को संयुक्त राष्ट्रसंघीय महासन्धिअन्तर्गत कुनै आधार छैन,” मनिलाले एक वक्तव्यमा भनेको छ ।