अपराजित यात्री..

उनको घर, पूर्वीपाल्पा–रामपुर,वडा नं. ३ को रजघरा । पढाई स्नातक । कुनै समय उनी गाउँमा मास्टरी गर्थे । २०३६ सालमा नेकपा मालेको गाउँ सक्रिय दलको सदस्य भए । त्यतिबेला उनको उमेर १७ वर्षको थियो । १९ वर्षको लक्का जवानीमा अनेरास्ववियू पाल्पाको सदस्य भए । ३९ सालमा उपाध्यक्ष र सोही वर्ष नै अध्यक्ष बन्ने कठिन अवसर मिल्यो ।

उनलाई २०४० मा साविक लुम्बिनी अञ्चलको अनेरास्ववियू सचिव बन्ने सुनौलो अवसर जु¥यो । २०४० सालमै गाउँ पार्टी सक्रिय दलको सचिव बनेर राजनीतिक यात्राका सारथी बने । तत्कालीन पञ्चायती व्यवस्थाविरुद्धको यात्रामा क्रियाशील राजनीति गर्ने उनले २०४५ मा अनेरास्ववियू काठमाडौंको सहसचिव बनेर आफ्नो विद्यार्थी जीवनलाई संघर्षशील सावित गरे ।

सम्वत् २०४७ मा पाल्पा ईलाका नं.२ को पार्टी सचिवको जिम्मेवारी बोकेपछि त उनको राजनीतिक जीवन यात्रा अविरल बग्दै आएको छ । २०५० सालमा पार्टीको पाल्पा जिल्ला कमिटी सदस्य बनेका उनले २०५५ मा उपसचिव बनेर आफ्नो राजनीतिक जिम्मेवारीलाई सार्थक तुल्याएका थिए ।

२०६० मा पार्टीभित्र आन्तरिक लोकतन्त्रको अभ्यास गर्दै पाल्पा जिल्ला कमिटी सचिव बनेर आफूलाई अब्बल कम्युनिष्ट कार्यकर्ताका रुपमा दर्ज गरे । राजनीतिक पाठशालामा सामाजिक उत्तरदायित्व बोक्दै आएका उनी सादा जीवन,उच्च विचारका धनी मानिन्छन् । कडा बोली,सरल व्यवहार उनको पहिचान हो ।

२०६६ मा राष्ट्रिय परिषद् सदस्य बनेका उनलाई २०६९ सालमा पाल्पाका पार्टी पङ्तिले भारी मतका साथ अध्यक्ष चुन्न आन्तरिक प्रतिस्पर्धात्मक विधिलाई रोजेका थिए । श्रेष्ठता हासिल गरेका उनले पार्टीलाई पाल्पा जिल्लाको पहिलो पार्टीका रुपमा स्थापित गर्न कुनै कसुर राखेनन् । २०७० सालमा संविधान सभाको दोस्रो निर्वाचनमा पाल्पा क्षेत्र नं.१ बाट प्रत्यक्ष निर्वाचित उनले संविधान सभामार्फत संविधान निर्माणमा विशेष भूमिका निर्वाह गरेका थिए । पार्टीका वफादार नेता,सरल ब्यक्तित्व एवम् परिपक्क नेताका रुपमा उनलाई चिनिन्छ ।

२०७३ सालमा साविकको पाँच नम्बर प्रदेश ( वर्तमान,लुम्बिनी प्रदेश)को सचिवालय सदस्य बनेका उनलाई केन्दीय नेतृत्वले अत्यन्तै राम्रोसँग बुझेर २०७८ को पौष महिनादेखि लुम्बिनी प्रदेश संगठन कमिटीको अध्यक्षको जिम्मेवारी सुम्पेको थियो ।

दुई वर्षको अध्यक्षकालमा उनले स्थानीय निर्वाचन र प्रदेश एवम् संघीय निर्वाचनमा पार्टीलाई दरोरुपले उभ्याए । प्रदेश एवम् संघीय निर्वाचनमा उनको नेतृत्वले नेकपा एमालेलाई लुम्बिनी प्रदेशकै पहिलो पार्टीका रुपमा दर्ज ग¥यो । जिल्ला अधिवेशनहरु सम्पन्न गरेकोमात्र होइन,पार्टी प्रशिक्षण,विभिन्न खालका तालिम र संगठनात्मक कार्यक्रमहरु गरेर पार्टीप्रति आकर्षण बढाएका थिए ।

पहिलो पटक आयोजित लुम्बिनी प्रदेश एमालेको अधिवेशनमा आफूलाई अध्यक्षका रुपमा प्रस्तुत गरेका राधाकृष्ण कंडेलले प्युठानका हरिप्रसाद रिजालसँग लोकतान्त्रिक प्रतिस्पर्धा गर्दैछन् । पार्टीको आन्तरिक प्रतिस्पर्धा होस् वा संसदीय क्षेत्रमा सधैं अब्बल सावित कंडेलको अपराजित यात्रा निरन्तर चलिरहेको छ । खासमा उनी अपराजित यात्री हुन् ।