एमाले लुम्बिनी प्रदेश अधिवेशन : अध्यक्ष ओलीलाई पर्खिँदै (फोटो फिचर)

बुटवल । नेकपा (एमाले) को प्रथम लुम्विनी प्रदेश अधिवेशन आजदेखि बुटवलमा हुँदै छ । अधिवेशन उद्घाटनका लागि अध्यक्ष केपी शर्मा ओलीसहित शिर्ष नेताहरु शनिबार बुटवल आएका छन् ।   बुटवलको अन्तर्राष्ट्रिय सम्मेलन केन्द्रको परिसरमा जारी उद्घाटनसत्रमा एमाले नेता कार्यकर्ताले अध्यक्ष ओलीलाई पर्खिएर बसेका छन् ।

मध्यान्न १२ बजे उद्घाटन गर्ने भनिएको सभामा अध्यक्ष ओली भने अझै उपस्थित भएका छैनन् । लुम्बिनी प्रदेशका विभिन्न जिल्लाबाट हजारौंको सङ्ख्यामा प्रतिनिधि तथा एमाले नेता कार्यकर्ताहरु कार्यक्रममा उपस्थित भएका छन् ।

यो वर्षलाई अधिवेशन वर्षको रुपमा घोषणा गरेको एमालेले यस लगत्तै अन्य प्रदेशहरुमा पनि अधिवेशनको तयारी अघि बढाएको छ । लुम्बिनीको पहिलो अधिवेशनले पार्टी र मुलुकलाई नयाँ सन्देश दिने नेताहरुले दाबी गरेका छन् ।

अधिवेशनले यसअघि ५७६ सदस्यीय रहेको प्रदेश संगठन कमिटीलाई २०५ सदस्यीय बनाउनेछ । सम्मेलनका लागि रुपन्देहीबाट सबैभन्दा धेरै १ सय ६४, कपिलवस्तुबाट ७२, दांङबाट १३१, बाँकबाट ५४, बर्दियाबाट ७४, रुकुमपूर्वबाट १२, रोल्पाबाट २७, प्युठानबाट ५७, अर्घाखाँचीबाट ८२, गुल्मीबाट १११, पाल्पाबाट ८३ र पश्चिम नवलपरासीबाट ५२ जना प्रतिनिधि छनोट भएका छन् । त्यस्तै जनसंगठनबाट ८३ गरी जम्मा १००४ जना प्रतिनिधि छनोट भएका एमाले प्रचार प्रसार विभाग प्रमुख डिआर घिमिरेले बताए ।