श्रीधरकाे शब्द संगितमा आमा संगै सिम्रनको अभिन्य (भिडियाे)

बुटवल  । सामाजिक सञ्जालबाट ‘भाइरल’ बनेकी बागलुङकी १८ वर्षीया प्रतिभा सिम्रन परियारले एकपछि अर्को गीत गाउने मौका पाइरहेकी छन् । केहीअघि उनी एक साता काठमाडाैं बसेर दर्जनभन्दा बढी गीतमा स्वर दिएर गाउँ फर्केकी थिइन् । अहिले गाउँमै छायाँकन गरिएकाे म्युजिक भिडियाे सार्वजनिक भएकाे छ, जसमा उनले आफ्नै आमासँग अभिनय गरेकी छन् । 

आज सिम्रनकै स्वरमा रहेकाे गायक तथा संगीतकार श्रीधर अधिकारीको नयाँ गीत ‘संसारकी प्यारी आमा’ बोलको गीत सार्वजनिक भएको छ । श्रीधरको आफ्नै युट्युब  च्यानलमार्फत रिलिज गरिएको गीतले राम्रो भ्युज पाइरहेको छ । म्युजिक भिडियो हेरेका दर्शकले पनि उत्साहित प्रतिक्रिया दिएका छन् । युट्युबमा म्युजिक भिडियो हेरिसकेपछि डा. विष्णुमूर्ति भट्टराई लेख्छन्, ‘निकै मीठो, मर्मस्पर्शी गीत । आमाको मायाको बयान जति गरे पनि सकिँदैन ।’

आमाको ममताबारे बयान गरेको गीतको रचनाकार एवं संगीतकार श्रीधर नै हुन् । म्युजिक भिडियोको निर्देशन पनि श्रीधरले नै गरेका हुन् । बागलुङस्थित सिम्रनकै गाउँमा छायाँकन गरिएको म्युजिक भिडियोमा सिम्रनसँगै उनकी आमा मनिसा परियारको अभिनय छ ।

नवगायिका सिम्रन बागलुङ नगरपालिका वडा ६, लङगाउँस्थित तीनतलेकी हुन् । उनी विद्यामन्दिर मावि कक्षा १२ मा अध्ययनरत छिन्। सिम्रनका बुबा सोम परियार वैदेशिक रोजगारीका लागि विदेशमा छन् ।

यसअघि ‘मुटुमा घाउ छ’ बोलको श्रीधरको गीत सिम्रनले नै गाएकी थिइन् । संगीतकार अर्जुन सापकोटाले लेखेको चर्चित गीत 'पानी परेकाे' मा पनि सिम्रनकै स्वर छ ।